2025 жылы Каспий құбыр желісі арқылы 70,5 млн тонна мұнай тасымалданды

2025 жылы Каспий құбыр консорциумы Теңіз – Новороссийск мұнай құбыры жүйесі арқылы 70,52 млн тонна мұнай тасымалдады, деп хабарлайды Интерфакс-Қазақстан.

Консорциумның басқару органдарының отырысы қорытындысы бойынша, аталған көлемнің ішінде 2025 жылы Теңіз кен орнынан 36,6 млн тонна, Қарашығанақтан 9,2 млн тонна және Қашағаннан 17 млн тонна мұнай құбыр жүйесіне жеткізілген.

Жиында компанияның 2025 жылғы өндірістік және шаруашылық қызметінің нәтижелері шығарылып, еңбекті қорғау, өнеркәсіптік және экологиялық қауіпсіздік бағытындағы көрсеткіштері қаралды. Сондай-ақ биылғы жылға арналған жоспарлар талқыланды.

Қаңтар айында Консорциумның 2025 жылғы операциялық нәтижелері туралы Қазақстан Үкіметінің баспасөз қызметі де хабарлаған болатын.

Бұған дейін 2024 жылы консорциум құбыр жүйесі арқылы 63,01 млн тонна мұнай жөнелткен. Осылайша, 2025 жылы жөнелтілім көлемі 11,9%-ға артты.

Қаспий құбыр желісі Батыс Қазақстан мен Каспий қайраңындағы ресейлік кен орындарын Новороссийскідегі теңіз терминалымен байланыстырады. Құбыр бағытының ұзындығы шамамен 1,5 мың шақырымды құрайды. Бұл жүйе – қазақстандық мұнай экспортының негізгі бағыты. Қазақстан аумағынан айдалатын мұнайдың 80%-дан астамы осы құбыр арқылы өтеді. Консорциум жылына Қазақстан аумағынан шамамен 72,5 млн тоннаға дейін, ал Ресей арқылы 83 млн тоннаға дейін мұнай тасымалдауға қауқарлы.

Консорциумның акционерлері қатарында Ресей Федерациясы (оның ішінде «Транснефть» басқаруындағы үлес – 24%, балансындағы үлес – 7%) – 31%, Қазақстан («ҚазМұнайГаз» – 19% және Kazakhstan Pipeline Ventures LLC – 1,75%) – 20,75%, Chevron Caspian Pipeline Consortium Company – 15%, LUKOIL International GmbH – 12,5%, Mobil Caspian Pipeline Company – 7,5%, Rosneft-Shell Caspian Ventures Limited – 7,5%, BG Overseas Holding Limited – 2%, Eni International N.A. N.V. – 2% және Oryx Caspian Pipeline LLC – 1,75% бар.