ЕҚДБ Қазақстанның ЖІӨ өсімі болжамын 4,7%-ға дейін көтерді

Еуропалық қайта құру және даму банкі 2026 жылға арналған Қазақстанның жалпы ішкі өнім (ЖІӨ) өсімі бойынша болжамын 4,7%-ға дейін жақсартты. Бұл туралы 2026 жылғы ақпанда жарияланған Regional Economic Prospects жаңартылған шолуында айтылған. Бұған дейін қыркүйектегі болжамда экономикалық өсім 4,5% деңгейінде болады деп көрсетілген.

Банктің бағалауынша, 2025 жылы Қазақстанның нақты ЖІӨ өсімі 6,5%-ға жетіп, 2011 жылдан бергі ең жоғары көрсеткіш тіркелді. Бұған негізінен Теңіз мұнай кен орнын кеңейту жобасының аяқталуы әсер етіп, өнеркәсіп өндірісі жылдық есеппен 7,5%-ға артқан. Сонымен қатар жүк тасымалы көлемінің ұлғаюы, оның ішінде Орта дәліз бағыты арқылы, және тұтынушылық несиелеудің белсенділігі көлік пен сауда салаларындағы іскерлік белсенділікті күшейтті.

Банк сарапшылары макроэкономикалық жағдайға ықпал ететін негізгі факторлардың бірі ретінде инфляциялық қысымның сақталуын атайды. Осыған байланысты елдегі пайыздық мөлшерлемелер жоғары деңгейде қалып отыр. Ұлттық банктің базалық мөлшерлемесі 18% деңгейінде. 2025 жылдың желтоқсанында инфляция 12,3% болды.

Банктің болжамына сәйкес, мұнай бағасының төмендеуіне байланысты 2026 жылы экономикалық өсім 4,7%-ға дейін баяулап, 2027 жылы 4,5% болады. Төмендеу тәуекелдері мұнай экспортында Каспий құбыр консорциумының инфрақұрылымына шамадан тыс тәуелділікпен байланысты. Дегенмен бұл қауіптер инфрақұрылымға тұрақты инвестициялар тарту және экономиканы әртараптандыру шаралары арқылы азайтылып отыр.

Еске салсақ, 2025 жылы Қазақстанның ЖІӨ 6,5%-ға ұлғайды. Халықаралық валюта қоры 2026 жылға арналған нақты ЖІӨ өсімі болжамын 4,4%-ға дейін төмендетті. Ал AERC болжамы бойынша, 2026 жылы экономика жиынтық ұсыныс моделі негізінде 4,8%-ға, ал жиынтық сұраныс моделі бойынша 4,9%-ға өседі. Қазақстан Үкіметі биылғы жылдың қорытындысы бойынша экономикалық өсім 5,4% деңгейінде болады деп күтуде.