Enbek.kz сайтында жұмыс берушілер ұсынатын ең жоғары жалақы қанша

2025 жылдың желтоқсан айында Enbek.kz электрондық еңбек биржасында жұмыс берушілер 109,6 мың бос жұмыс орнын орналастырса, жұмыс іздеушілер 71,5 мың түйіндеме жариялады. Қараша айымен салыстырғанда бос орындар саны 8,4%-ға (+8,5 мың) өсті, ал түйіндемелер саны 29,4%-ға (-29,8 мың) төмендеді. Нәтижесінде жыл соңында жұмыс күшіне сұраныс ұсыныстан айтарлықтай асып түсіп, бос жұмыс орындарының саны түйіндемелерден шамамен 38 мыңға көп болды, деп хабарлайды Kapital.kz іскерлік ақпарат орталығы, еңбек және халықты әлеуметтік қорғау министрлігінің баспасөз қызметіне сілтеме жасап.

Сұраныс құрылымында әлі де әлеуметтік және негізгі салалар жетекші рөл атқарды. Ең көп бос орын білім беру саласында орналастырылды – 23,3 мың, бұл жалпы санының 21,3%-ын құрады. Дәл осындай көлем басқа қызмет түрлеріне тиесілі болды – 23,2 мың бос орын (21,2%). Ауыл шаруашылығы, орман шаруашылығы және балық шаруашылығында да айтарлықтай сұраныс сақталды, мұнда 18,7 мың бос орын (17,1%) орналастырылды. Жалпы алғанда, осы үш бағыт желтоқсан айында жарияланған барлық бос орындардың шамамен 60%-ын құрады.

Сұраныс денсаулық сақтау және әлеуметтік салада (7,2 мың бос орын), өңдеуші өнеркәсіпте (6,2 мың), көтерме және бөлшек саудада (6,1 мың), құрылыс саласында (3,8 мың бос орын) да сақталды. Бұл жұмыс берушілер жылдың соңында да экономиканың негізгі салаларына қызметкерлерді іздеуді жалғастырғанын көрсетеді.

Өз кезегінде жұмыс іздеушілер арасында әлеуметтік және кеңсе жұмысына байланысты мамандық өкілдері белсенді болды. Атап айтқанда, есепшілердің – 1 463, заңгерлердің – 1 132, сондай-ақ медбикелердің – 1 181 түйіндемелері ең көп жарияланды.

Жыныс бойынша жұмыс іздеушілердің белсенділігі тең болды деуге келеді: барлық түйіндемелердің 52,1%-ын әйелдер, 47,9%-ын ерлер орналастырды. Әйелдер көбінесе білім беру, денсаулық сақтау және бухгалтерия салаларында, ал ерлер техникалық және басқарушылық бағыттар бойынша жұмыс іздеді.

Айта кету керек, желтоқсандағы түйіндемелердің негізгі бөлігі 35 жасқа дейінгі жастарға тиесілі болды – барлық жұмыс іздеушілердің 40,8%-ы, оның ішінде 24 жасқа дейінгі жастар 15,2%-ды құрады. Содан кейін 35-44 жас (29,9%) және 45-54 жас (19,1%), сондай-ақ 55 жастан асқан адамдар (10,2%) болды.

Жалақы бойынша желтоқсандағы бос жұмыс орындарында ең жоғары ұсыныстар өндіріс басшысы (≈1,8 млн теңге), кеніш дирекциясының директоры (≈1 млн теңге) және химиялық инженер (≈1 млн теңге) лауазымдарында болды. Жұмыс іздеушілер тарапынан ең жоғары жалақы күтілімдері агроном-энтомологтар (≈3,4 млн теңге), стюардессалар (≈3,3 млн теңге) және компьютерлік жабдық монтаждаушылары (≈2,7 млн теңге) түйіндемелерінде тіркелді.

2025 жылдың желтоқсанында Электрондық эеңбек биржасындағы еңбек нарығы бос жұмыс орындары санының өсуін және жұмыс іздеушілердің белсенділігінің айтарлықтай төмендеуін көрсетті, бұл жылдың соңына тән құбылыс. Жұмыс берушілер әлеуметтік салада, қызмет көрсету саласында және ауыл шаруашылығында жұмыскерлерді іздеуді жалғастырумен болды, ал көптеген жұмыс іздеуші жаңа жыл басталғанға дейін жұмыс іздеуді кейінге қалдырды. Бұл маусымға байланысты сипат және 2026 жылдың басында жұмыс іздеушілердің белсенділігінің артуы мен еңбек нарығының теңгерімді көрінісін күтуге мүмкіндік береді.

Еске салайық, 2025 жылдың 1 желтоқсанындағы жағдай бойынша, елімізде еңбек құқықтарын бұзудың шамамен 8 мың фактісі анықталды.