Қазақстанда бес жыл ішінде міндетті декларациялау күшін жоюы мүмкін

Бес жыл ішінде Қазақстанда міндетті декларациялау күшін жоюы мүмкін. Бұл туралы бүгін Үкімет отырысының қорытындысы бойынша өткен баспасөз конференциясында ҚР Қаржы вице-министрі Ержан Биржанов мәлімдеді, деп хабарлайды Kapital.kz іскерлік ақпарат орталығының тілшісі.

«Бүгінде жаңа Салық кодексі аясында біз алдын ала толтыру элементтерін қарастырдық және келесі жылдан бастап шағын бизнес үшін алдын ала толтырылған нысанды ұсына аламыз. Ал алдағы уақытта бұл функцияны кеңейтемыз. Мәселен, қазіргі таңда ірі бизнеспен арада «горизонталды мониторинг» жобасы бар, онда біз хабарлама алмасамыз және ірі бизнес өзінің барлық ішкі есептеулері мен құжаттамаларын ұсынады. Сондықтан, егер біз барлық мазмұнды, барлық деңгейдегі операцияларды көретін болсақ, алдағы уақытта декларация тапсырудың қажеттілігі болмайды», - деп нақтылады ол журналистердің сұрақтарына жауап бере отырып.

Ол Қаржы министрлігі бұл жобаны салық төлеушілердің басқа санаттарына да тарату үшін бизнес-қоғамдастықпен жұмыс істеп жатқанын айтты.

«Бұл - біздің негізгі міндеттеріміздің бірі. Егер барлығы цифрлық форматқа өтсе, онлайн-алмасуды жолға қойсақ, агенттік құрамдас бөліктер мен есепке алу жүйелері арқылы жұмыс істейтін болсақ, онда декларация тапсыру қажеттілігі өздігінен жойылады», - деп түсіндірді Ержан Биржанов.

Алдын ала толтырылған деректерде алшақтық болған жағдайда кім және қалай жауапты болатыны туралы сұраққа ол: салық төлеуші алдын ала толтырылған декларациямен келісе алады немесе оған түзетулер енгізе алады, деп жауап берді.

«Яғни, бұл біз салық төлеушінің рөлін толық өз мойнымызға аламыз және бұл өзгермейтін константа дегенді білдірмейді. Керісінше, бұл 90%-ға дейін алдын ала толтырылған нысан. Салық төлеуші: «Жоқ, мына табысты мен табыс деп есептемеймін, өйткені ол басқа бапқа жатады» деп, оны түзете алады. Мұндай мүмкіндік бар», - деп атап өтті вице-министр.

Еске сала кетейік, Қазақстанда жалпыға бірдей декларациялау 2021 жылы енгізілді. Алғашқы болып декларацияны мемлекеттік қызметшілер, оларға теңестірілген тұлғалар және олардың жұбайлары тапсыра бастады. 2023 жылы бұл міндеттеме квазимемлекеттік сектор өкілдеріне, ал 2025 жылы бизнес өкілдеріне енгізілді.