Қазақстанда ірі желілер арқылы арзандатылған сиыр етін сату кеңінен жүргізілмек

Бүгін үкімет отырысында еліміздің әлеуметтік-экономикалық дамуы мен 2025 жылғы қаңтар-қараша аралығындағы республикалық бюджеттің орындалуы қорытындыланды, деп хабарлайды Kapital.kz іскерлік ақпарат орталығының тілшісі.

Отырыста Премьер-министр Олжас Бектенов 2025 жылы Қазақстан экономикасы тұрақты өсім көрсетіп отырғанын айтты. Жылдың 11 айының қорытындысы бойынша ЖІӨ өсімі 6,4%-ды құрады. Дегенмен, экономиканың жалпы өсу көрсеткіштеріне қарамастан, сауда, құрылыс және көлік қызметтері саласында баяулау байқалуда.

«Соңғы екі айда инфляция деңгейі 12,4%-ға төмендеді. Алайда кейбір өңірлерде баға өсуі тіркелді. Олар – Ұлытау, Ақмола және Атырау облыстары. Негізгі себеп – азық-түлік бағасының қымбаттауы. Өңір әкімдерінде азық-түлік бағасын тұрақтандыруға барлық құралдар бар. Осы бағытта жұмысты күшейту қажет. Сауда министрлігіне әлеуметтік маңызы бар азық-түлік өнімдерінің уақытша тізімін кеңейту бойынша жұмысты жеделдетуді тапсырамын», — деді ол.

Сонымен қатар, азық-түлік инфляциясына ет және ет өнімдерінің үлесі айтарлықтай болғандықтан, сауда, ауыл шаруашылығы министрліктері мен әкімдіктер бағаны ұстап тұруға ерекше назар аударуы тиіс.

«Сондай-ақ, Астана тәжірибесіне сүйене отырып, еліміз бойынша ірі сауда желілерінде арзандатылған сиыр етін сатуды кеңейту қажет. Жалпы, инфляциялық процестерді төмендету үшін 2026-2028 жылдарға арналған Макроэкономикалық тұрақтандыру және халықтың әл-ауқатын арттыру бойынша бірлескен іс-қимыл бағдарламасының іске асырылуын бақылауда ұстау керек», – деп атап өтті Олжас Бектенов.

Екіншіден, «Алтын сапа» және «Парыз» сыйлықтарының лауреаттарын марапаттау рәсімінде Мемлекет басшысы шағын бизнесті қолдаудың бірыңғай бағдарламалық құжатын қабылдауды тапсырды. Бұл құжат іскерлік белсенділікті арттыруға және шағын кәсіпкерлікті дамытуға қосымша серпін беруі тиіс.

«Ұлттық экономика министрлігі мемлекеттік органдар және «Атамекен» ұлттық палатасымен бірлесіп, осы құжатты сапалы әзірлеуді қамтамасыз етуі қажет. Онда жергілікті өндірісті және шикізатты қайта өңдеуді ынталандыру, қолөнер, былғары, сүт өнімдері және басқа да салаларды кеңейту шаралары қарастырылуы тиіс», — деп атап өтті Премьер.

Әкімдіктер өңірлік әлеует пен қажеттіліктерді ескере отырып, басым бағыттарды айқындауы керек.

Аталған шаралар кәсіпкерлерге тікелей қолдау көрсетіп, халықты жұмыспен қамтуды арттырып, шағын бизнестің тұрақтылығын күшейтпек. Бұл әсіресе ауылдар мен шағын қалаларға қатысты маңызды.

«Үшінші. Іскерлік бастаманы кеңейту мен тең мүмкіндіктерді қамтамасыз етудің негізгі шарттарының бірі – экономикадағы мемлекеттік үлесті төмендету. Қазіргі кезде бұл көрсеткіш ЖІӨ-де 13,7%-ды құрайды. Биыл 2025 жылға дейінгі кешенді приватизация жоспарының жүзеге асырылуы аяқталады», – деді ол.

2030 жылға дейінгі жаңа оңтайландыру жоспары бекітілді, оған отын-энергетикалық кешендегі, өнеркәсіп, көлік және байланыс, агроөнеркәсіптік кешендегі мемлекеттік компаниялар кіреді.

«Әкімдіктерге, мемлекеттік органдарға, компанияларға жаңа жоспардағы активтердің кемінде жартысын 2026 жылы іске асыруды қамтамасыз ету үшін жұмысқа кірісуді тапсырамын. Ұлттық жекешелендіру кеңсесі салалық мемлекеттік органдармен бірлесіп, оңтайландыруға енбеген салаларды талдауды жалғастыруы қажет», — деп түсіндірді Олжас Бектенов.

Төртінші. Мемлекет басшысының халыққа Жолдауында өңдеу өнеркәсібіне жаңа серпін беру маңызды деп аталды.

«Оң нәтижелер бар, оларды жақында үкімет отырысында қарадық. Биыл жаңа өндірістер іске қосылды, бұрын елімізде өндірілмеген тауарлар шығарыла бастады. Өнеркәсіп, қаржы министрліктеріне «Самұрық-Қазына» қоры және Монополияға қарсы органмен бірлесіп мемлекеттік сатып алу аясында импортталатын ұқсас тауарларды алып тастау мәселесін пысықтауды тапсырамын», — деді ол.

Бұл шаралар отандық өндірушілерге қосымша қолдау көрсетуге мүмкіндік бермек.

Премьер өнеркәсіп министрлігіне өңір әкімдіктерімен бірлесе отырып, жылдың соңына дейін келесі жылға арналған жобалар пулын толық қалыптастыруды тапсырды.

«Жобаларды қаржыландыру инвесторлардың өзара міндеттемелері шарттарында жүзеге асырылуы тиіс. Инвестиция көлемі, жаңа жұмыс орындарының саны, еңбек өнімділігін арттыру, жерсіндіру мен технологияларды енгізу, экспорттық әлеует пен салық түсімдерін көбейту көрсеткіштері қарастырылуы қажет», — деп атап өтті ол.

Бесінші. Бюджет қаражатын уақытылы игеру үшін бюджет бағдарламаларының әкімшілері қаржылық тәртіпті күшейтуі қажет. Барлық жоспарланған қаражат тек бекітілген бағыттар бойынша жұмсалуы тиіс.

«Бюджет бағдарламаларының әкімшілеріне өз міндеттемелерін орындауды талдап, үнемделген қаражат болса, оны басым міндеттерге немесе Үкімет резервіне бағыттауды тапсырамын. Артық қаражатты әкімдіктер даму бюджетін кеңейтуге пайдалана алады. Бюджет бағдарламаларының әкімшілері жобаларды келісімшарт сомалары шегінде жүзеге асыруға тиіс, олардың қымбаттауына жол бермеу қажет», — деді Олжас Бектенов.

Үкімет басшысы министрліктер мен әкімдіктерге құрылыс-монтаж жұмыстарын қаржыландырылмаған түрде сатып алу жариялауға болмайтынын атап өтті.

«Қаржы министрлігіне өңір әкімдіктерімен бірлесе отырып, мемлекеттік бюджет кірістерінің жоспарлы көрсеткіштерін қамтамасыз етуді тапсырамын. Жалпы, мемлекеттік және жергілікті атқарушы органдар ағымдағы жылдың барлық жоспарлы көрсеткіштеріне жету үшін барлық ресурстарды жұмылдыруы қажет», — деп қорытындылады ол.

Естеріңізге сала кетейік, бұған дейін әлеуметтік маңызы бар азық-түлік өнімдерінің тізіміне қандай өнімдер енгізілетіні белгілі болған еді. Сауда және интеграция министрлігі тиісті жобаны талқылауға шығарды. Жаңартылған тізімге қызанақ, қияр, алма, сүйегі бар сиыр еті, сүйексіз сиыр еті, тартылған ет, сүйегі бар қой еті, балғын немесе салқындатылған балық, мұздатылған балық, ультрапастерленген сүт, қаймақ, қатты ірімшік, қара шай енгізілді.