Екі МӨЗ жекешелендіруге шығарылады

Ұлттық жекешелендіру офисі Атырау мұнай өңдеу зауытын (АМӨЗ) және Павлодар мұнай-химия зауытын (ПМХЗ) жекешелендіру нысандарының қатарына қосты, деп хабарлайды Kapital.kz іскерлік ақпарат орталығының тілшісі.

Аталған нысандарды 2028 жылы бәсекелі ортаға беру көзделуде. Зауыттарды ашық екі кезеңді конкурс, электрондық конкурс немесе тікелей сату арқылы жекешелендіру жоспарлануда.

Айта кетейік, 2025 жылдың 21 қарашасында Ұлттық жекешелендіру офисі жекешелендіруге арналған 473 нысанның тізімін бекітті.

Бұған дейін Бәсекелестікті қорғау және дамыту агенттігі АМӨЗ бен ПМХЗ-дің 50%-дық үлестерін жекешелендіруге шығаруды ұсынған болатын.

«Біз жеке басқару моделі қолданылатын Шымкент МӨЗ-дің табысты жұмыс істеп жатқанын көріп отырмыз. Бұл мемлекет тарапынан лауазымды тұлғалардың болмауын, апаттардың азаюын, технологиялық ақаулардың төмендеуін және жөндеу жұмыстарына кететін шығындардың аздығын білдіреді. Бұл жеке басқарудың мемлекеттік басқарудан тиімдірек бола алатынын дәлелдейді», – деп атап өткен болатын агенттік өкілдері.

Бәсекелестікті қорғау және дамыту агенттігінің төрағасы Марат Омаров та жеке басқарудың зауыттардың жұмыс тиімділігіне оң әсер ететінін, соның ішінде жөндеу жұмыстарының жиілемеуіне және тарифтердің айтарлықтай өсуінің алдын алуға көмектесетінін атап өткен.

Мұнан соң «ҚазМұнайГаз» (ҚМГ) монополияға қарсы ведомствоның ұсынысына өз пікірін білдірді.

«Павлодар және Атырау МӨЗ-деріндегі үлестерді жекешелендіру – бұл Бәсекелестікті қорғау және дамыту агенттігінің мұнай өңдеу саласындағы және мұнай өнімдері нарығындағы бәсекелестікті дамыту мақсатында квазимемлекеттік сектордың үлесін азайтуға бағытталған ұсынысы. «ҚазМұнайГаз» бұл мәселені қарастырып жатыр, өйткені мұндай шешімдерге дайындық – әрі корпоративтік деңгейде, әрі техникалық және экономикалық аспектілер тұрғысынан біраз уақытты талап етеді. Іс жүзінде мұндай процестер бірнеше жылға созылады», – деп хабарлады ҚМГ.

2025 жылдың мамырында «ҚазМұнайГаз» басқарма төрағасының орынбасары Әсет Мағауов Атырау мұнай өңдеу зауытын «Татнефть» компаниясының сатып алу мүмкіндігі жоққа шығарылмайтынын айтқан еді.

«...АМӨЗ бойынша олар (Татнефть – ред.) бізге кейбір қондырғыларды ауыстыруға байланысты техникалық мәселелер бойынша консультациялар көрсеткен. Ал алдағы уақыттағы ынтымақтастыққа келсек, жалпы ҚМГ-ні дамыту аясында біз барлық компаниялармен, солардың қатарында «Татнефть»-пен де жұмыс істеу мүмкіндігін қарастырамыз», – деді ол зауытты сенімгерлік басқаруға беру мәселесі талқыланып жатқан-жатпағаны туралы сұраққа жауап бергенде. Ол сондай-ақ өткен жылы АМӨЗ-ге Sinopec компаниясы да қызығушылық танытқанын тілге тиек етті.

«Атырау мұнай өңдеу зауыты» ЖШС және «Павлодар мұнай-химия зауыты» ЖШС «ҚазМұнайГаз» ұлттық компаниясына тиесілі.