СҚ-Фармация дәрі-дәрмек пен медициналық құралдар сатып алуды 2026 жылы 7,2%-ға ұлғайтады

2026 жылы «СҚ-Фармация» 2000-нан астам дәрі-дәрмек пен медициналық құралдарды сатып алуды жоспарлап отыр. Бұл 2025 жылға қарағанда 7,2%-ға көп. Жалпы қажеттілік сомасы 567 миллиард теңгеден асады. Бұл қаражат азаматтарды ТМККК және МӘМС шеңберінде дәрі-дәрмектермен қамтамасыз ету үшін қажет, деп хабарлайды Kapital.kz іскерлік ақпарат орталығы Денсаулық сақтау министрлігінің баспасөз қызметіне сілтеме жасап.

Ведомство түсіндіргендей, 2026 жылы 400-ден астам дәрі-дәрмек тікелей – делдалсыз сатып алынады, бұл өткен жылдың көрсеткішімен салыстырғанда 2,7 есе көп.

«Мұндай динамика министрдің №110 бұйрығымен бекітілген жаңартылған Ережелерде көрсетілген жаңа сатып алу механизмдерін енгізудің нәтижесі болып отыр. Тікелей өндіруші зауыттардан баға ұсыныстарын сұратуға басты назар аударылды, бұл сатып алу бағасын төмендетуге, ашықтықты арттыруға және құнның қалыптасуына бақылауды күшейтуге мүмкіндік береді. Сатып алу бұрынғыдай БҰҰДБ, ЮНИСЕФ және ТОҚТА ТБ халықаралық ұйымдары арқылы жүзеге асырылады. Халықаралық институттар арқылы сатып алынатын позициялар саны 87%-ға өсті (23-тен 43-ке). Бұл механизм әлемдік бәсекелес бағалар арқылы елеулі үнемдеуді қамтамасыз етеді, ал босатылған қаражат пациенттерді қосымша дәрі-дәрмекпен қамтамасыз етуге бағытталады», – делінген Денсаулық сақтау министрлігінің хабарламасында.

Сатып алынған дәрі-дәрмек пен медициналық құралдарды биылғы жылдың желтоқсан айында Бірыңғай дистрибьютордың қоймаларына жеткізу жоспарлануда. Медициналық ұйымдарға 2026 жылдың қаңтарынан бастап жеткізілмек.

Ұсынылған ақпаратқа сәйкес, 2024 жылы Дәрі-дәрмек сатып алу ережесіне өзгерістер енгізіліп, баға ұсыныстарын сұрау жаңа механизмі бекітілді. Енгізілген жаңа талаптан кейін өндірушілерден тікелей сатып алынатын препараттар саны 2025 жылғы науқанмен салыстырғанда бес есе артты.

«Ашықтықты қамтамасыз ету үшін «СҚ-Фармация» ресми сайтында сатып алу туралы ашық хабарландырулар жарияланады. Сол уақытта жеткізушілермен келіссөздер қарқынды жүргізіледі: дайындық кезеңінде баға талдауы мен оңтайлы шешімдер ізделеді. 2025 жылғы сатып алу науқанының қорытындысы бойынша 70 миллиард теңгеден астам үнемделген», – деп хабарлады министрліктегілер.

Бірыңғай дистрибьютор тікелей сатып алу үлесін кеңейтуді және өндірушілермен ұзақмерзімді келісімшарт жүйесіне көшуге ниетті. Ведомствоның болжамынша, бұл бағаның тұрақтылығын, қай уақытта жеткізілетіндігін және логистиканың ұзақ мерзімді тұрақтылығын қамтамасыз етеді.

Азаматтарды дәрі-дәрмекпен уақтылы қамтамасыз ету мақсатында «СҚ-Фармация» 2027 жылға арналған сатып алу науқанын 2026 жылдың мамырында бастамақ.

Бұған дейін Жоғарғы аудиторлық палата 2022-2024 жылдары Бірыңғай дистрибьютор амбулаторлық көмек шеңберінде 207 препаратты кешіктіріп сатып алғанын, 164 препаратты сатып алмағанын хабарлаған болаты. 2024 жылы препараттардың тек 9%-ы өндірушілерден тікелей алынған. Сонымен қатар, дистрибьютор үнемі «СТ-KZ» сертификаты жоқ дәрілерді сатып алған, бұл үш жыл ішінде 258 миллиард теңгеге жеткен. Сондай-ақ Сыбайлас жемқорлыққа қарсы күрес агенттігі «СҚ-Фармацияда» жемқорлық тәуекелдерін тіркеді.

Мәжіліс депутаты Бақытжан Базарбек «СҚ-Фармация» ЖШС-ның бұрынғы басшылығын қылмыстық жауапкершілікке тартуды талап етті.