Қазақстанда 263 компанияның салықтан жалтару дерегі анықталды
Заңды тұлғалар бизнесті жалған қайта ұйымдастыру тәсілін қолданған
Мемлекеттік кірістер комитеті негізсіз салықтық жеңілдік алу үшін бизнесті жалған қайта ұйымдастыру әрекетіне барған 263 компанияны анықтады, деп хабарлайды Kapital.kz іскерлік ақпарат орталығы МКК баспасөз қызметіне сілтеме жасап.
Комитеттің мәліметінше, компаниялар 2021-2024 жылдар аралығында қайта ұйымдастыру кезінде жалпы сомасы 31,7 млрд теңгені құрайтын ҚҚС асығын пайдаланған. Салық кодексінің нормаларына сәйкес аталған сомалар есептен шығарылып, нәтижесінде бюджетке 3 млрд теңге түскен, сондай-ақ 20 млрд теңге көлеміндегі ҚҚС асығы қысқартылған.
«Мемлекеттік кірістер органдары салық төлеуден жалтару схемаларын анықтау және жолын кесу бойынша тұрақты түрде жұмыс жүргізеді. Осындай схемалардың бірі — негізсіз салықтық пайда алу мақсатында кәсіпорындарды қайта ұйымдастыру рәсімін пайдалану. Қалыпты тәжірибеде бизнесті қайта ұйымдастыру қызметті кеңейту, бизнес-процестерді оңтайландыру, компанияларды біріктіру немесе жұту үшін жүргізіледі. Соңғы жылдары бұл рәсімді салық міндеттемелерін, оның ішінде қосылған құн салығын (ҚҚС) төлеуден жалтару үшін пайдалану жағдайлары жиілеп кетті. Мемлекеттік кірістер органдары әрекеттерінің заңдылығы сот тәжірибесімен расталған. Бүгінде кассациялық соттарда 10-нан астам іс қаралып, барлық шешім мемлекеттік кірістер органдарының пайдасына шығарылды», — деп түсіндірді МКК.
Мұндай әрекеттердің жолын кесу үшін Салық кодексіне өзгерістер енгізілді. 2026 жылғы 1 қаңтардан бастап бизнесті қайта ұйымдастыру рәсімі тек салықтық әкімшілендіру жүргізілгеннен кейін ғана жүзеге асырылады.
Еске салайық, жазда Қазақстанда еңбекақы төлеу қорынан бірыңғай төлем енгізу бойынша пилоттық жоба іске қосылады. Жобаға шамамен 500 компания қатысады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
