ЕДБ «Силлено» полиэтилен зауытына 450 млн доллар инвестициялайды
Қазақстанның жобаға қатысу үлесі – 40%, Ресейдің СИБУР компаниясы мен Қытай тарапының үлесі – 30%-дан
Еуразиялық даму банкі (ЕДБ) Атырау облысында орналасқан «Силлено» полиэтилен өндіру зауытына 450 млн АҚШ доллары көлемінде инвестиция салуды жоспарлап отыр. Бұл туралы бүгін өткен баспасөз мәслихатында ЕДБ басқарма төрағасының орынбасары Ярослав Мандрон мәлімдеді, деп хабарлайды Kapital.kz іскерлік ақпарат орталығының тілшісі.
«Егер ауқымды, маңызды жоба туралы айтатын болсақ, онда полиэтилен өндіру жөніндегі «Силлено» жобасын атап өтуге болады. Биыл біз бұл жобаға 450 млн доллар көлемінде инвестиция салу туралы келісімге қол қойдық, қаржыландыру СИБУР арқылы жүзеге асырылды. Жобаға Қытай тарапы да өте белсенді қатысуда. Жалпы жобаның құны 2 млрд доллардан асады, оның ішінде Қазақстанның үлесі – 40%, СИБУР – 30%, Қытай тарапы – 30%», – деп түсіндірді ол.
Аталған қаржыландыру жобаның алғашқы кезеңіне арналған бридж-кредит болып табылады. Жалпы алғанда, жобаны қаржыландыру көлемі 8 млрд доллардан асады.
«Бұл – мұнай-газ химиясы саласындағы бірлескен қаржыландырудың үлкен үлгісі. «Силлено» жобасы біз үшін қаржыландыру көлемі жағынан биылғы ең ауқымды жоба», – деп нақтылады ЕДБ басқарма төрағасының орынбасары.
Еске сала кетейік, 2024 жылдың шілде айында Астанада өткен Қазақстан – Қытай іскерлік кеңесінің 7-ші отырысы аясында «ҚазМұнайГаз» ҰК» АҚ, «СИБУР Холдинг» ААҚ және Sinopec Overseas Investment Holding компаниялары «Силлено» жобасы бойынша қатысушылар хаттамасына қол қойған болатын. Тараптар Атырау облысында жылдық қуаты 1,25 млн тонна болатын полиэтилен өндіретін алғашқы интеграцияланған газ-химия кешенін салу үшін түпкілікті инвестициялық бюджетті келісуге ниетті екенін растады.
«СИБУР Холдинг» ААҚ – полимерлер мен синтетикалық каучук өндіретін ірі компания. 2023 жылдың наурыз айында СИБУР «Полиэтилен» жобасына ресми түрде қосылды.
Sinopec – энергия және мұнай-химия саласындағы тікелей интеграцияланған корпорация, әлемдегі ең ірі химия компанияларының бірі. Компания 2024 жылдың наурызында жобаға ресми түрде қатысушы болды.
«Силлено» ЖШС – Атырау облысындағы алғашқы интеграцияланған газ-химия кешенін салу жөніндегі екінші кезеңнің операторы. Компания жоба жүзеге асырылып жатқан «Ұлттық индустриялық мұнай-химия технопаркі» арнайы экономикалық аймағының қатысушысы болып табылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
