Қазақстандық тауар өндірушілер Реестрі: министрлік мамандандырылған чатты іске қосты

ҚР Өнеркәсіп және құрылыс министрлігі «QazIndustry» АҚ бірлесіп, Қазақстандық тауар өндірушілер Реестрімен жұмыс істеуге арналған мамандандырылған Telegram-чатты іске қосты. Чат өз өнімдерін Реестрге енгізуге өтінім беруді жоспарлап отырған кәсіпорындармен жедел байланыс орнатуға арналған.

«Мемлекеттік цифрлық сервис - ОТӨ Реестрі - әуелден ашықтық пен кері байланыс қағидаттарына негізделіп құрылды. Мамандандырылған чат бізге кәсіпкерлердің сұрақтарына жедел жауап беруге, ал тауар өндірушілерге кездесетін проблемаларды көтеріп, жұмыс істеу тәжірибесімен бөлісуге мүмкіндік береді. Осындай талқылау алаңының арқасында түйіткілді тұстарды уақтылы анықтап, бизнес өкілдерімен бірлесіп шешімін табуға тырысамыз әрі ережелерді де, Реестрдің цифрлық функционалын да жетілдіріп отырамыз», – дейді «QazIndustry» АҚ дирекциясы басшысы Жансая Жақыпова.

Жаңа алаңның маңызды міндеті – өзара тәжірибе алмасу, осылайша қатысушылар өтінім толтыру кезіндегі жиі кездесетін қателерді талқылап, табысты кейстермен және деректер мен құжаттарды дайындау жөніндегі ұсынымдармен бөлісе алады.

Чат тақырыптық тармақтарға бөлінген, бұл талқылауларды жүйелеуге және маңызды ақпараттың жалпы хабар ағынында жоғалып кетпеуіне мүмкіндік береді. Бөлімдер Реестр ережелерін, өтінім беру тәртібін, жеке кабинетпен жұмысты, СЭҚ ТН кодтарына қатысты сұрақтарды және салалық ерекшеліктерді қамтиды. Әр бөлімде кәсіпорындар ресми түсіндірмелер алып, практикалық шешімдермен алмаса алады.

Чатқа кірмес бұрын шағын тіркеу сауалнамасы жүргізіледі. Бұл спамды азайтып, кәсіпорындармен сапалы әрі тиімді іс-қимыл орнатуға мүмкіндік береді.

Чат Министрлік пен тауар өндірушілер арасындағы коммуникацияның тұрақты алаңына әрі  Реестрді одан әрі дамыту бойынша ұсыныстарды жинайтын жүйеге айналады.

Естеріңізге сала өтсек, қазақстандық тауар өндірушілер Реестрі туралы барлық жаңалықтар Өнеркәсіп және құрылыс министрлігінің сайтында арнайы бөлімде және https://t.me/eondiris  Telegram-каналында жарияланады.

Анықтама:

Қазақстандық тауар өндірушілер реестрі - Өнеркәсіп және құрылыс министрлігі мен «Электрондық қаржы орталығы» АҚ бірлесіп әзірлеген мемлекеттік цифрлық сервис. Ол өнімнің шынымен Қазақстанда өндірілгенін растап, мемлекеттік қолдау шараларын ұсыну барысындағы ашықтықты қамтамасыз етуге арналған. 2026 жылдың 1 қаңтарынан бастап Реестр қолданыстағы индустриялық сертификаттар мен СТ KZ сертификаттарын алмастырып, олардың функцияларын біртұтас цифрлық жүйеде біріктіреді.