Алатау қаласы арнайы құқықтық режимге көшеді
Президент Қасым-Жомарт Тоқаев Конституциялық заңға қол қойды
Президент Қасым-Жомарт Тоқаев «Алатау қаласының арнайы құқықтық режимі туралы» Қазақстан Республикасының Конституциялық заңына қол қойды. Конституциялық заңның негізгі мақсаты қаланың жедел және тұрақты дамуы үшін жағдай жасау болып табылады, деп хабарлайды Ақорданың баспасөз қызметі.
Қаланың ерекше құқықтық мәртебесіне сай инновациялар, инвестициялар және экономикалық өсім үшін қолайлы орта құруға бағытталған дербес экожүйені қалыптастыруды көздейтін түбегейлі жаңа тәсілдер қолданылады.
Конституциялық заңға сәйкес, қаланы мемлекеттік басқарудың жаңа моделі енгізілді. Атап айтқанда, кәсіпкерлік, кеден ісі, цифрлық активтер, құмар ойындары, әлеуметтік сала, қаржы нарығы, архитектура мен қала құрылысы, экология әрі қоршаған ортаны қорғау, мәдениет, спорт және тағы басқа салаларды реттеудің негізгі қағидалары белгіленді.
«Алатау резиденті» құқықтық мәртебесі бекітілді. Арнаулы мәртебені әкімшілік бірқатар санат бойынша жеке және заңды тұлғаларға береді. Арнайы режимнің қолданылу көлемі мен тиісті құқықтар, міндеттер мен талаптар осы резидент мәртебесіне қарай анықталады.
Шаһардың ұзақ мерзімді инвестициялық және технологиялық өркендеуі стратегиялық құжаттар негізінде қамтамасыз етіледі. Нақты айтқанда, Алатау қаласының ұзақ мерзімді даму жоспары, мастер-жоспары және дамыту стратегиясы қабылданады.
Еске сала кетейік, 2026 жылғы наурызда Парламент депутаттары «Алатау қаласының арнайы құқықтық режимі туралы» Конституциялық заң жобасын қабылдады. 2028 жылға дейін Алатауда 365,1 млрд теңгеге инфрақұрылымдық жобаларды іске асыру жоспарланып отыр. Бұған дейін хабарланғандай, Alatau City құрылысы бойынша бас кеңесші сингапурлық сарапшы болады.
2025 жылғы мамырда сингапурлық Surbana Jurong компаниясымен бірлесіп әзірленген жаңа қаланың Бас жоспары қабылданды. Алатаудағы жерлер шетелдік инвесторларға меншікке берілмей бөлінеді. Инвесторлар қаланың әлеуетіне қазірдің өзінде қызығушылық танытуда: 1,8 трлн теңгеге 44 инвестициялық жобадан тұратын пул қалыптасты. Жаңа қалада жеке қаржылық архитектура, басқару моделі және ерекше құқықтық режим әрекет ететін болады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
