Әлемдегі ең ірі Airbus A380 лайнерлері шұғыл тексеруден өтеді
Инспекцияға Emirates және Qantas әуе компанияларының 16 ұшағы ілікті
Еуропалық авиациялық қауіпсіздік агенттігі (EASA) бірнеше лайнердің қанат құрылымындағы элементтердің бірінен сызаттар табылғаннан кейін 16 Airbus A380 ұшағына шұғыл тексеру жүргізуді бұйырды, деп жазады Интерфакс-Қазақстан.
Зақымдар құрылымды алдыңғы тексерулер барысында анықталған және EASA бұл ақаулар «қанаттың құрылымдық тұтастығына нұқсан келтіруі» мүмкін деп қауіптенеді.
«Осы ықтимал қауіпті мәселені шешу үшін Airbus қосымша арнайы егжей-тегжейлі инспекция жүргізуді қажет деп тапты», - делінген EASA мәлімдемесінде.
Реттеушінің 24 шілдеде күшіне енген директивасына сәйкес, бес ұшақ дереу тексерілуі тиіс, тағы 11 ұшақ – 25 ұшу циклі ішінде тексеруден өтуі керек. Airbus компаниясы тексерулер жүргізуге қолдау көрсетіп жатқанын және жөндеу жұмыстарының қажеттілігін немесе лайнерлерді коммерциялық пайдалануға қайтаруға болатын-болмайтынын анықтау үшін олардың нәтижелерін EASA-мен бірлесіп бағалайтынын мәлімдеді.
Тексерулер, атап айтқанда, A380 лайнерлерінің ең ірі операторы болып табылатын Emirates әуе компаниясының 15 ұшағын, сондай-ақ Аустралияның Qantas компаниясының бір ұшағын қамтиды.
Airbus A380 – әлемдегі ең үлкен жолаушылар лайнері. Бұған ұқсас мәселе бұрын да болған: 2012 жылы қанат элементтерінен сызаттар табылғаннан кейін әуе компаниялары бұл ұшақтардың ұшуын бірнеше аптаға тоқтата тұруға мәжбүр болған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
