- Басты бет
- Технологиялар
- Air Astana ұшақтарында спутниктік интернет сынақтан өткізіледі
Air Astana ұшақтарында спутниктік интернет сынақтан өткізіледі
Пилоттық жоба 2026 жылдың төртінші тоқсанында іске қосылады
2026 жылдың төртінші тоқсанында Air Astana әуе компаниясының ұшақтарында жоғары жылдамдықты спутниктік интернетті пилоттық режимде сынақтан өткізу басталады. Бұл мәселе Телекоммуникациялар комитеті, Air Astana және Viasat компанияларының өкілдері қатысқан кездесуде талқыланды, деп хабарлайды Kapital.kz іскерлік ақпарат орталығы Жасанды интеллект және цифрлық даму министрлігінің баспасөз қызметіне сілтеме жасап.
«Тараптар жолаушыларды ұшу кезінде жоғары жылдамдықты интернетпен қамтамасыз ету жобасын іске асыру перспективаларын, сондай-ақ ұшақтарды спутниктік байланыс жүйесіне қосуға қатысты құқықтық, техникалық және ұйымдастырушылық мәселелерді талқылады. Нормативтік-құқықтық реттеу, әуе кемелерінің бортында байланыс қызметтерін көрсету жөніндегі халықаралық тәжірибе және жобаны іске асырудың келесі кезеңдерін үйлестіру мәселелеріне ерекше назар аударылды. Кездесу қорытындысы бойынша тараптар ынтымақтастықты дамытуға мүдделі екенін растап, бірлескен жұмысты жалғастыруға келісті», – делінген ақпаратта.
Бұған дейін 2026 жылдың соңына дейін «Қазақстан темір жолы» компаниясының 27 жолаушылар бағыты сымсыз интернетпен қамтылатыны хабарланған болатын. Ал республикалық және облыстық маңызы бар автожолдарды интернетпен толық қамту 2027 жылға жоспарланған.
Сондай-ақ 2026 жылдың соңына дейін 3 мыңнан астам ауыл жоғары жылдамдықты интернетке қосылып, спутниктік байланыс пен 5G желісін пойыздарда, ұшақтарда және автожолдарда кеңейту жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
