• Басты бет
• Технологиялар
• Yahoo! негізін қалаушы Джерри Янг Қазақстаннан бастау алған Nace.AI стартабына инвестиция салды

Yahoo! негізін қалаушы Джерри Янг Қазақстаннан бастау алған Nace.AI стартабына инвестиция салды

Кремний алқабында жұмыс істейтін компания корпоративтік секторға арналған жасанды интеллект шешімдерін әзірлейді

Қазақстаннан бастау алған, бүгінде Кремний алқабында жұмыс істейтін Nace.AI жасанды интеллект стартабы Yahoo! компаниясының негізін қалаушы, Alibaba инвесторы Джерри Янгты инвестор ретінде тартты. Бұл туралы стартаптың негізін қалаушы әрі бас директоры Дос Бақытжан мәлімдеді, деп хабарлайды Kapital.kz іскерлік ақпарат орталығы.

Оның айтуынша, Джерри Янг – әлемдік интернет индустриясының алғашқы көшбасшыларының бірі әрі Кремний алқабындағы ең ықпалды кәсіпкерлердің бірі.

«Джерри Янг – Yahoo! компаниясының негізін қалаушы, әлемдік интернет индустриясының алғашқы көшбасшыларының бірі, Alibaba директорлар кеңесінің мүшесі әрі инвесторы, Кремний алқабындағы ең ықпалды кәсіпкерлердің бірі. Стартабымыз бен өнімдеріміздің осындай алып инвесторлардың қызығушылығын тудыруы – дұрыс бағытта келе жатқанымыздың айғағы», – деді Дос Бақытжан.

Оның сөзінше, инвестор компанияға қаржы салу туралы шешімді Nace.AI командасымен алғашқы кездесудің өзінде қабылдаған.

«Кездесуіміз шамамен екі сағатқа созылды. Бір сағаттай уақыт ішінде компаниямыздың стратегиясын, технологиялық бағытымызды және неліктен дәл осы тәсілді таңдағанымызды таныстырдым. Джерри техникалық білімі жоғары адам екен. Ол өніміміз, нарық, бәсекелестер және технологиямыздың қалай жұмыс істейтіні жөнінде терең сұрақтар қойды. Әсіресе әмбебап ірі модельдердің орнына шағын, салалық AI-модельдерге неге басымдық беретінімізге ерекше қызығушылық танытты», – деді стартаптың бас директоры.

Дос Бақытжанның айтуынша, Джерри Янгқа компанияның жеке AI-модельдерін әзірлеу тәсілі мен корпоративтік секторға бағытталған стратегиясы ұнаған.

«Біз ұйымдарға бизнес-процестері мен деректерін нақты уақыт режимінде талдауға мүмкіндік беретін құралдар жасап жатқанымызды түсіндірдік. Бұл – таза B2B-компания. Технологиямыз да, командамыз да оған ұнады. Ортақ түсіністікке өте тез келдік», – деді ол.

Кездесу қорытындысында Джерри Янг компанияға инвестиция салуға дайын екенін бірден білдірген.

«Шын мәнінде, алғашқы кездесудің өзінде-ақ нақты инвестициялық міндеттеме берілді. Ол ағымдағы инвестициялық раунд аясында қанша қаржы қажет екенін сұрады. Тіпті біз жоспарлағаннан әлдеқайда көп қаражат салуға дайын болды. Алайда біз компанияның осы кезеңдегі қажеттілігіне сай көлемді ғана алдық. Себебі басқа инвесторларға да орын қалдырып, үлестердің шамадан тыс болуына жол бергіміз келмеді», – деді Дос Бақытжан.

Nace.AI корпоративтік секторға арналған жасанды интеллект өнімдерін әзірлейді. Компанияның шешімдері аудитті, қаржылық талдауды және ірі корпоративтік деректер қорымен жұмысты автоматтандыруға мүмкіндік береді. Соның нәтижесінде қолмен атқарылатын жұмыстардың көлемі азайып, шешім қабылдау үдерісі жеделдейді.

Қазір стартапта шамамен 30 маман жұмыс істейді. Компанияның кеңселері Кремний алқабы мен Астанада орналасқан.

Бұған дейін Nace.AI халықаралық инвесторлардан 21,5 млн доллар инвестиция тартқаны, ал мәміленің 36 сағатқа жетпейтін уақытта аяқталғаны хабарланған болатын. Қазір стартаптың клиенттері қатарында әлемдік ірі компаниялар, оның ішінде халықаралық «Үлкен төрттік» өкілдері де бар.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз