• Басты бет
• Технологиялар
• Астана – Семей – Достық пойызында Starlink интернеті іске қосылды

Астана – Семей – Достық пойызында Starlink интернеті іске қосылды

Жеке тасымалдаушы пойызға интернет орнатты

«Арай транс KZ» компаниясының Астана – Семей – Достық бағытындағы №121/122 пойызында Starlink технологиясы бойынша спутниктік интернет қосылды. Бұл — интернет желісіне қосылған жеке тасымалдаушылар қызмет көрсететін алғашқы бағыт, деп хабарлайды Kapital.kz іскерлік ақпарат орталығы Көлік министрлігінің баспасөз қызметіне сілтеме жасап.

Жоба Көлік министрлігінің заманауи цифрлық шешімдерді енгізу және жолаушылар тасымалының сапасын арттыру бойынша жұмысы аясында жүзеге асырылған.

«Технологияны енгізу Қазақстандағы теміржол тасымалдаушыларының цифрлық және телекоммуникациялық шешімдер саласындағы көпжылдық серіктесі – Kaztechnology инженерлік компаниясының қатысуымен жүзеге асырылды. Компания «Арай транс KZ» ЖШС-мен тығыз ынтымақтастықта Астана – Семей – Достық бағытына Starlink спутниктік интернет технологиясын енгізуді қамтамасыз етті. Бұл жолаушыларға арналған заманауи сервистерді дамыту жолындағы кезекті маңызды қадам болды», деді министрлікте.

Ведомство ақпаратына сәйкес, спутник байланысын пайдалану бұрын ұялы телефон байланысы болмаған теміржол учаскелерінде интернетке қосылуды қамтамасыз етеді. Бұл жолаушыларға маршруттың шалғай учаскелерінде де байланыста болуға мүмкіндік береді.

Қосылу үшін пойыздағы Wi-Fi желісін таңдап, авторизациядан өту қажет.

Жолаушыларға қосылудың екі нұсқасы бар:

- WhatsApp және Telegram-да мәтіндік хабар алмасу үшін ақысыз қол жетімділік;

- интернет-ресурстарға, әлеуметтік желілерге, бейне сервистерге және жұмыс қосымшаларына толық қолжетімділігі бар ақылы тариф.

Ақылы қызметтер үшін төлем Kaspi.kz, Halyk, Apple Pay, Google Pay, Visa және MasterCard банк карталары сияқты ыңғайлы әдістер арқылы жүзеге асырылады.

Спутниктік интернетті енгізу жолаушылардың жайлылығын арттырып, цифрлық қызметтерге қолжетімділікті кеңейтеді және теміржол көлігі қызметтерінің сапасын ұлғайтады, деп атап өтті ведомтсвода.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз