- Басты бет
- Технологии
- Қазақстанда 50-ден астам AI-агент құрылып жатыр
Қазақстанда 50-ден астам AI-агент құрылып жатыр
Министр қазірдің өзінде осы шешімдерге практикалық сұраныс барын айтты
Қазақстанда мемлекеттік органдар әртүрлі салалар бойынша азаматтар үшін 50-ден астам AI-агентті қалыптастырып жатыр. Бұл туралы бүгін Үкімет отырысында Премьер-министрдің орынбасары — жасанды интеллект және цифрлық даму министрі Жаслан Мәдиев айтты, деп хабарлайды Kapital.kz іскерлік ақпарат орталығы.
Министр Қазақстанда ЖИ-ді медицинада және кәсіпкерлікте енгізу жұмыстарын баяндады. Бүгінде енгізіліп жатқан жасанды интеллект ассистенттері тиімді нәтиже көрсетіп отыр.
Ведомство басшысы Cerebra AI жүйесін мысалға келтірді. Бұл жүйе бірқатар өңірде инсульттан болатын өлім-жітімді 40%-ға төмендетуге мүмкіндік берді, ал бизнесті бастау бойынша Қаржы министрлігімен бірлескен жоба кәсіпкерлерге операциялық шығындарды 2 есеге қысқарта отырып, оңтайлы орындарды таңдауға көмектесті.
«Денсаулық сақтау саласындағы нәтижелі кейстердің бірі – Cerebra AI. Бұл – инсультті ерте диагностикалауға арналған жасанды интеллект. Ол компьютерлік томография нәтижесін 30 минуттың орнына 5-10 минут ішінде талдайды. Ол инсульт диагностикасын едәуір жылдамдатады және дәлдігін арттырады. Жүйе елордадағы 17 емханада, сондай-ақ Ақмола, Маңғыстау, Жамбыл және Алматы облыстарында енгізілді», — деп атап өтті министр.
Сонымен қатар ол бүгінде мемлекеттік органдар әртүрлі салалар бойынша азаматтар үшін 50-ден астам AI-агентті қалыптастырылып жатқанын атап өтті.
Қазірдің өзінде осы шешімдерге практикалық сұраныс барын айтты. Мәселен, eGov AI ассистенті 2,3 миллионнан астам рет пайдаланылды, құқықтық AI-кеңесші 230 мыңнан астам кеңес берді, AI-терапев 35-тен астам клиникада енгізілуде, сондай-ақ білім беру саласында AI-агенттер енгізіліп жатыр, деді ол.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
