KASKASU тау-шаңғы курортына шамамен 172 млрд теңге инвестиция салынады
Түркістан облысындағы туристік кластер жыл бойы жұмыс істейді
Премьер-министрдің бірінші орынбасары Нұрлыбек Нәлібаев Түркістан облысына жұмыс сапары барысында «Сайрам-Өгем» мемлекеттік ұлттық табиғи паркінде экологиялық туризмді дамыту мәселелеріне арналған көшпелі кеңес өткізді. Шараға 50-ден астам отандық және шетелдік әлеуетті инвестор қатысып, өңірде жүзеге асырылуы жоспарланған инвестициялық жобалар талқыланды, деп хабарлайды Primeminister.kz.
Мемлекет басшысы Қасым-Жомарт Тоқаевтың тапсырмалары шеңберінде кеңесте экотуризмді дамыту, табиғи аумақтарды сақтай отырып, туристік инфрақұрылымды жетілдіру, сондай-ақ инвестиция тарту мәселелеріне баса назар аударылды.
Экология және табиғи ресурстар министрі Ерлан Нысанбаев ұлттық парктердің туристік әлеуетін пайдалану, халықаралық деңгейдегі экотуризм нысандарын қалыптастыру және орнықты туризм қағидаттарын енгізу бойынша атқарылып жатқан жұмыстар туралы баяндады. Оның айтуынша, бұл бастамалар аймақтың туристік әлеуетін арттырып қана қоймай, жаңа жұмыс орындарын ашуға, жергілікті экономиканы дамытуға және табиғи ресурстарды ұтымды пайдалануға мүмкіндік береді. Сондай-ақ инвесторларға көрсетілетін мемлекеттік қолдау шаралары таныстырылды.
Кездесу барысында «Сайрам-Өгем» ұлттық паркінің аумағында жүзеге асыру жоспарланған бірқатар инвестициялық жоба ұсынылды. Атап айтқанда, Біркөлік шатқалында экологиялық, отбасылық және белсенді туризмді дамытуға арналған демалыс аймағын салу жобасы таныстырылды. Сонымен қатар Қасқасу шатқалында туристік-рекреациялық кешен салу және Сайрамсу шатқалында туристік инфрақұрылымды қалыптастыру жөніндегі бастамалар қаралды.
Төле би және Түлкібас аудандарында халықаралық стандарттарға сай келетін туристік апарт-кешендер салу жоспары да көрсетілді. Жобалар аясында апартаменттер, бутик-отельдер, демалыс аймақтары, қоғамдық кеңістіктер мен сервис нысандарын тұрғызу көзделген.
Оған қоса KASKASU халықаралық тау-шаңғы кластерінің тұжырымдамасы таныстырылды. Жоба Түркістан облысын Орталық Азиядағы тау туризмінің жетекші орталықтарының біріне айналдыруға бағытталған. «China Construction Sixth Engineering Bureau Corp. LTD» компаниясымен бірлесіп жүзеге асыру жоспарланған жоба аясында халықаралық стандарттарға сай тау курорты инфракұрылымын қалыптастыру қарастырылған.
Жоба шеңберінде туристік ауылдар, қонақүйлер, отбасылық демалыс аймақтары, спорттық және ойын-сауық нысандарын, сондай-ақ заманауи аспалы жолдар салу жоспарланған. Инфрақұрылымның жыл бойы жұмыс істеуге бейімделуі өңірдің туристік тартымдылығын арттыруға тиіс. Жобаға салынатын инвестицияның жалпы көлемі шамамен 172 млрд теңгені құрайды.
Кеңес қорытындысы бойынша Нұрлыбек Нәлібаев экотуризм табиғатты қорғау мен экономикалық дамуды ұштастыратын маңызды бағыт екенін атап өтті. Оның айтуынша, инвестициялық жобаларды жүзеге асыру кезінде құрылыс сапасына, экологиялық талаптардың сақталуына және белгіленген мерзімдердің орындалуына ерекше назар аудару қажет.
«Президенттің тапсырмасына сәйкес, экотуризм экономиканың басым бағыттарының бірі болып айқындалды. Бұл – табиғи байлығымызды сақтап, оны ел игіліге тиімді пайдалану жолындағы маңызды бастама. Сондықтан барлық ұсыныс мұқият зерделеніп, нақты есептелген және жүзеге асыруға қолайлы жобаларға басымдық берілуі керек. Біз бастамашыл әрі жауапты инвесторларды қолдауға дайынбыз. Ең бастысы – сапалы нәтижеге қол жеткізу және жобаларды уақытылы жүзеге асыру», — деп қадап айтты Нұрлыбек Нәлібаев.
Премьер-министрдің бірінші орынбасары инвестициялық жобаларды орындау кезіндегі инвесторлардың жауапкершілігіне арнайы тоқталды. Оның сөзінше, әрбір жоба нақты міндеттемелер мен белгіленген мерзімдерге сәйкес атқарылуы тиіс. Келісімшарт шарттары сақталмаған жағдайда жер учаскесі мемлекетке қайтарылады.
«Бізге әдемі эскиздер емес, нақты нәтиже керек. Сондықтан әрбір жоба бойынша міндеттемелер мен жүзеге асыру мерзімдері нақты айқындалуы тиіс. Егер инвестор өз міндеттемелерін орындамаса, жер мемлекетке қайтарылады», — деді Нұрлыбек Нәлібаев.
Жұмыс сапары барысында Нұрлыбек Нәлібаев Түркістан облысының әкімі Нұрлан Көшеровпен бірге тікұшақпен «Сайрам-Өгем» ұлттық паркінің аумағын аралап, оның табиғи және туристік әлеуетімен танысты. Табиғи экожүйені сақтау және туристік инфракұрылымды дамыту мәселелері қаралды.
Көшпелі кеңес қорытындысы бойынша жауапты мемлекеттік органдар мен инвесторларға экотуризмді дамытуға бағытталған жобаларды жедел жүзеге асыру, инвесторлармен өзара іс-қимылды күшейте түсу, ұлттық парктің халықаралық туристік тартымдылығын арттыру және барлық жобаның белгіленген мерзімде сапалы орындалуын қамтамасыз ету бойынша тапсырмалар берілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
