Қазақстанда жол бойындағы сервис құрылысына 180 млрд теңге инвестиция салынады
2030 жылға қарай республикалық маңызы бар жолдардың бойында 250 сервис нүктесін ашу көзделіп отыр.
Қазақстан Үкіметі Көлік министрлігі мен «Car Park Transformer» ЖШС арасындағы инвестициялық келісімді мақұлдады. Жоба жаңартылатын энергия көздерін пайдалана отырып, жол бойындағы сервис станцияларын салуды көздейді. Тиісті қаулыға Премьер-министр қол қойды, деп хабарлайды Primeminister.kz.
Жеке инвестицияның жалпы сомасы 179,5 миллиард теңгені құрайды. Жоба аясында 2030 жылға дейін халықаралық және республикалық маңызы бар автомобиль жолдарының бойындағы қазіргі демалыс алаңдарында 250 сервис станциясы салынады.
Алғашқы 50 станция биыл қолданысқа беріледі. Олар — айналасы абаттандырылып, көгалдандырылған, ішінде санитарлық-тұрмыстық бөлмелері, сауда және қызмет көрсету орындары, электрлі көліктерді қуаттау станциялары мен күн панельдері бар заманауи көпфункционалды кешендер.
Жобаны жүзеге асыру халықаралық стандарттарға сай келетін жол бойындағы сервис нысандарының желісін кеңейтуге, электромобильдерге арналған заманауи инфрақұрылым құруға және көлік саласына экологиялық шешімдерді енгізуге мүмкіндік береді. Сондай-ақ бұл құрылыс іргелес өңірлердің әлеуметтік инфрақұрылымын дамытуға серпін бермек. Жоба аясында 2 мың жаңа жұмыс орны ашылады.
Қазіргі уақытта Қазақстанда халықаралық және республикалық маңызы бар автожолдардың бойында барлығы 1 428 сервис нысаны жұмыс істеп тұр.
Бұған дейін Қазақстанда 2026 жылы 11 мың шақырымнан астам жол салынып, жөнделетіні хабарланған болатын. Сонымен қатар автожол саласында «e-Joldar» бірыңғай жүйесін іске қосу жоспарланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
