Қазақстанда құрылыс мониторингі үшін жасанды интеллектіні енгізу жобасы кеңейтіледі

Қазақстанда құрылыс мониторингіне арналған жасанды интеллект (ЖИ) жобасын кеңейту қолға алынуда. Бұл туралы бүгін үкімет отырысында тұрғын үй құрылысы саласын дамыту мен цифрландыру жайлы баяндама жасаған вице-премьер – жасанды интеллект және цифрлық даму министрі Жаслан Мәдиев мәлімдедід, деп хабарлайды Kapital.kz іскерлік ақпарат орталығының тілшісі.

«2025 жылдың соңында Астанада құрылыс мониторингіне арналған компьютерлік көру және жасанды интеллект технологияларын енгізудің пилоттық жобасы іске қосылды. Жыл соңына дейін жобаны кеңейту жоспарланған. Жүйе жерді мақсатсыз пайдалану мен қала құрылыстық жоспарлардан ауытқуды ерте кезеңдерде автоматты түрде анықтауға мүмкіндік береді. Бұл алдын алу бақылауының құралын жасап, құрылыс мониторингін жедел жүзеге асыруға жағдай жасайды», – деді ол.

Жасанды интеллект және цифрлық даму министрлігі өнеркәсіп және құрылыс министрлігімен бірлесіп құрылыс саласының цифрлық трансформация картасын жүзеге асыруда. Құжат процестерді цифрландыру арқылы саланың тиімділігін арттыруға және қала құрылысын жоспарлауды жетілдіруге бағытталған.

«Қазірге дейін 20 негізгі процесс цифрландырылды. Сондай-ақ электрондық келісімшарттар, құжаттарды автоматты тексеру, цифрлық актілер, API және BIM-технологиялары арқылы мониторинг енгізілетін болады. Нәтижесінде рәсімдердің ашықтығы артып, қызмет көрсету мерзімдері қысқарады, ал саланың тиімділігі 46%-ға дейін өседі», – деп нақтылады министр.

Қазіргі таңда құрылыс саласында 54 мемлекеттік қызмет көрсетіледі, және олардың барлығы онлайн қолжетімді. Бұл қызметтерді азаматтар мен бизнес үшін алу процесін жеңілдетеді. Ең сұранысқа ие қызметтерге мүлікті мекенжайлау, жобалау материалдарын беру, рұқсаттар алу, объектілерді пайдалануға тапсыру және эскиздік жобаларды келісу жатады.

«Негізгі жүктеме жоспарлау және жобалау кезеңдеріне түседі. 2025 жылдың қорытындысы бойынша қызметтердің 96%-ы электрондық форматта көрсетілді. 2026 жылғы 9 қаңтарда 2026–2027 жылдарға арналған құрылыс саласын цифрландыру жоспары бекітілді», – деп түсіндірді Жаслан Мәдиев.

Құрылыс саласындағы бірыңғай цифрлық тәсіл үш бағытқа негізделген. Объектілерге цифрлық паспорттар беру арқылы сәйкестендірудің ашықтығы қамтамасыз етіледі. Объектілерді басқарудың цифрлық моделі олардың өмірлік циклінің барлық кезеңінде бірегей деректер негізінде енгізілуде.

«Astana Hub құрылыс саласында 32 инновациялық жобаны жүзеге асыруда, құрылыс басқару платформалары, сатып алулар мен сатуды автоматтандыру, объектілерді мониторингтеу, техника мен еңбек қауіпсіздігін басқару енгізілуде. Жобаларды іске асыру арқылы 750 жұмыс орны құрылды. 2025 жылдың қорытындысы бойынша қатысушылардың табысы 13 млрд теңгені құрады», – деп қорытындылады министр.