- Басты бет
- Мемлекет
- Қазақстаннан 17 тоннаға жуық жанар-жағармайды заңсыз алып өтпек болғандар анықталды
Қазақстаннан 17 тоннаға жуық жанар-жағармайды заңсыз алып өтпек болғандар анықталды
Шекарадағы өткізу пункттерінде екі айдың ішінде жанармай бактары заңсыз қайта жабдықталған 87 автокөлік анықталды
Екі ай ішінде Қазақстаннан 17 тоннаға жуық жанар-жағармайды сыртқа алып шығу әрекетінің жолы кесілді, деп хабарлайды Kapital.kz іскерлік ақпарат орталығы Ішкі істер министрлігінің баспасөз қызметіне сілтеме жасап.
ІІМ мәліметінше, жанар-жағармайды заңсыз алып шығу фактілері жиі тіркелетін шекара маңындағы аймақтарда патрульдік полицияның 59 бекеті жұмыс істеп тұр. Онда жанар-жағармайды заңсыз тасымалдауды, соның ішінде өту мүмкіндігі жоғары (жол талғамайтын) көліктерді пайдалану фактілерін анықтауға ерекше көңіл бөлінеді.
«Жанармай бактары үлкейтілген көліктердің көбі Жамбыл облысында тіркелген. Мәселен, Қордай ауданында құрылымы өз бетінше өзгертілген автобус анықталды. Тексеру барысында одан әрқайсысы 600 литрлік жасырын қосымша бактар табылды. Соңғы екі айдың өзінде полиция қызметкерлері 17 тоннаға жуық жанар-жағармайдың сыртқа шығарылуына тосқауыл қойды. Жанармай бактары қайта жабдықталған 87 автокөлік анықталып, олардың иелері әкімшілік жауапкершілікке тартылды», - деп хабарлады министрлік.
Сондай-ақ полиция қызметкерлері мемлекеттік кірістер органдарының өкілдерімен бірлесіп, қосымша жанармай бактарын орнатумен айналысқан 16 техникалық қызмет көрсету станциясын тексерді. Тексеру қорытындысы бойынша нысан иелерінің алтауына қатысты әкімшілік материалдар жиналды.
Бұған дейін Қырғызстанға бензинді заңсыз алып шығу ісі бойынша тергеудің аяқталғаны хабарланған болатын. Онда автокөлік жанармайы мұнай-химия өнімдері ретінде (атын жамылып) тасымалданған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
