Президент рақымшылық жасау туралы заңға қол қойды
Ол азаматтар мен мемлекеттің қауіпсіздігіне қатер төндірмейтін құқық бұзушылықтарды ізгілендіруге бағытталған
Мемлекет басшысы «Қазақстан Республикасының жаңа Конституциясының қабылдануына байланысты рақымшылық жасау туралы» Қазақстан Республикасының Заңына қол қойды, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.
Бұған дейін елімізде қылмыстық және әкімшілік рақымшылық жүргізілетіні хабарланған болатын.
Қылмыстық рақымшылық аясында қылмыстық теріс қылықтар мен ауырлығы жеңіл немесе орташа қылмыстар үшін, егер олар материалдық залал келтіруге әкеп соқпаса немесе келтірілген залал толық өтелсе, қылмыстық жауаптылықтан босату көзделген. Сондай-ақ келтірілген залал толық өтелген жағдайда ауыр және аса ауыр қылмыстар бойынша тағайындалған жаза мерзімін қысқарту қарастырылған.
Әкімшілік рақымшылық жеке тұлғаларды, кәсіпкерлерді, жекеше нотариустарды, адвокаттарды, қандастарды және Қазақстанның өзге де азаматтарын әкімшілік айыппұлдардан босатуды көздейді.
Рақымшылық азаматтар мен мемлекеттің қауіпсіздігіне қатер төндірмейтін құқық бұзушылықтарды ізгілендіруге бағытталған.
Еске салайық, бұған дейін жаңа Конституцияның қабылдануына арналған салтанатты іс-шарада мемлекет басшысы Қазақстанда әкімшілік рақымшылық жүргізілетінін мәлімдеген болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
