• Басты бет
• Мемлекет
• Алматыда сел қаупіне байланысты Наурызбай ауданының тұрғындары эвакуацияланып жатыр

Алматыда сел қаупіне байланысты Наурызбай ауданының тұрғындары эвакуацияланып жатыр

Тұрғындар уақытша мектептерде орналастырылуда

Алматының Наурызбай ауданында Ақсай өзенінің арнасы бойында орналасқан үйлердің тұрғындарын алдын ала эвакуациялау басталды. Бұған таудағы сел қаупінің күшеюі себеп болды, деп хабарлайды Kapital.kz іскерлік ақпарат орталығы төтенше жағдайлар министрлігінің баспасөз қызметіне сілтеме жасап.

«Азаматтардың қауіпсіздігін қамтамасыз ету мақсатында олар Наурызбай ауданындағы мектептер базасында ашылған халықты қабылдау пункттеріне уақытша орналастырылып жатыр. ТЖМ жедел штаб құрды, азаматтық қорғау қызметтері жұмыс істеуде. 8 (727) 279-22-32 нөмірі бойынша жедел желі іске қосылды. Қазіргі уақытқа дейін төрт қоңырау түсті. Барлық іс-шаралар жоспарлы режимде жүргізіліп жатыр, жағдай бақылауда. Қазіргі уақытта Наурызбай ауданы аумағындағы гидрологиялық жағдай тұрақты. Алматы қаласы ТЖД, бақылау және хабарлау қызметі, сондай-ақ ТЖМ-нің «Қазселденқорғау» мекемесінің апаттық-механикаландырылған бригадасы мен азаматтық қорғау қызметтері толық дайындық режимінде және гидрологиялық жағдайды тәулік бойы бақылауды жалғастырып жатыр», – деп мәлімдеді ТЖМ.

Жағдай толық тұрақтанып, қауіп жойылғаннан кейін тұрғындар үйлеріне қайта орала алады.

«Қазгидромет» мәліметінше, Алматы тауларында болжанған нөсер жауын-шашынға байланысты сел қаупі сақталып отыр. ТЖМ барлық құтқару қызметтері күшейтілген жұмыс режиміне көшірілгенін атап өтті. Жағдай тұрақты бақылауда, мамандар қауіпті учаскелерді тәулік бойы бақылап, төтенше жағдай туындаған жағдайда жедел әрекет етуге дайын.

Халықты жедел хабардар ету мақсатында Наурызбай ауданында жергілікті деңгейде құлақтандыру жүйесі іске қосылды. Бұл – алдын алу шарасы.

«Қауіпсіздігіңіз үшін Іле Алатауы тауларында ауа райы тұрақталғанға дейін жорықтар мен демалыстан уақытша бас тартуды қатаң сұраймыз. Егер қазірдің өзінде таулы аймақта болсаңыз, өзендердің жоғарғы ағысында қатты жаңбыр жауған жағдайда өзен арналары мен қауіпті учаскелерден дереу кетіңіз. Өзен арналарының, сел арналарының және бөгеттердің маңында шатырлы лагерьлер құрмаңыз. Есіңізде болсын: сел ағыны өте жылдам дамиды, сондықтан қауіпсіздіктің басты шарты – қауіпті аймақтан алдын ала кету. Тексерілмеген ақпаратты таратпауды және тек ресми ақпарат көздеріне ғана сенуді сұраймыз», – деп ескертті ТЖМ.

Еске салайық, 2024 жылғы 8 ақпанда сағат 02:20-да Алматы қаласының Медеу ауданындағы Тау-Самал шағынауданында Олимпийская көшесі бойында топырақ массасының сырғығаны туралы ақпарат түскен болатын. Алматы қаласы ТЖД мәліметінше, салдарынан екі жеке тұрғын үй зақымданып, оның бірі ішінара қирады. Оқиға салдарынан төрт адам қаза тапты.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз