Қазақстанда ғалымдардың мәртебесі заң жүзінде бекітіледі
Елде ғылыми қызметкерлердің құқықтары жөніндегі уәкіл институты құрылып жатыр
Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне ғылым, ғылымды қажет ететін өндіріс (аумақтар), әлеуметтік қамсыздандыру, білім беру, денсаулық сақтау және әскери қызмет мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды, деп хабарлайды Kapital.kz іскерлік ақпарат орталығы Ғылым және жоғары білім министрлігінің баспасөз қызметіне сілтеме жасап.
Құжат ғылыми қызметті қолдаудың жаңа тетіктерін әзірлеп, зерттеу нәтижелерін экономикаға енгізуге және елдің ғылыми әлеуетін нығайтуға септігін тигізеді.
Негізгі жаңашылдықтардың бірі – ғалымдар мен ғылыми қызметкерлердің мәртебесін заң жүзінде бекіту. Алғаш рет олардың құқықтары, міндеттері мен кепілдіктері жүйелі түрде айқындалды. Сондай-ақ ғылыми қоғамдастықтың мүдделерін қорғауға ықпал ететін Ғалымдар мен ғылыми қызметкерлердің құқықтары жөніндегі уәкіл институты құрылады.
Жас зерттеушілерді қолдауға ерекше көңіл бөлінген. Заң PhD бағдарламасы түлектерінің жұмысқа орналасу мүмкіндіктерін кеңейтеді, «жас ғалым» ұғымын енгізеді және ғылым саласына дарынды жастарды тарту үшін қосымша жағдайлар жасайды.
Заңның маңызды жаңалығы – құрамына ғылыми қалашықтар (наукоградтар) мен ғылыми-технологиялық парктер кіретін ғылымды қажет ететін аумақтарды (инновациялық аймақтарды) құру. Олар инновацияларды дамытуға, ғылым мен бизнестің өзара іс-қимылына, сондай-ақ жоғары технологиялық жобаларды жүзеге асыруға арналған алаңға айналады.
Құжатта ғылымды қаржыландыру тетіктерін жетілдіру, ғылыми инфрақұрылымды дамыту, ұжымдық пайдаланудағы зертханалар құру және ғылыми жабдықтарды цифрлық есепке алуды енгізу көзделген. Бұл ресурстарды пайдалану тиімділігін арттыруға, зерттеушілердің заманауи технологияларға қол жеткізуін қамтамасыз етуге және озық зерттеулер жүргізу мүмкіндіктерін кеңейтуге жағдай жасайды.
Өзгерістердің бөлек бір бағыты Қазақстан Республикасы Президентінің жанындағы Ұлттық ғылым академиясының елдегі стратегиялық болжау және ұзақ мерзімді ғылыми-технологиялық басымдықтарды айқындау мәселелеріндегі рөлін күшейтеді.
Бұған дейін Қазақстанда мемлекеттік тапсырысты орындайтын мемлекеттік ғылыми ұйымдар мен жоғары немесе жоғары оқу орнынан кейінгі білім беру мекемелерінің ғылыми қызметкерлеріне еңбекақы төлеу тәртібін өзгерту жоспарланғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
