- Басты бет
- Мемлекет
- 2026 жылы Қазақстанда сапалы жұмыс орындарының саны 3 миллионнан асады – Еңбек министрлігі
2026 жылы Қазақстанда сапалы жұмыс орындарының саны 3 миллионнан асады – Еңбек министрлігі
Биылғы бес айда Қазақстанда 200 мыңнан астам азамат жұмыспен қамтылды
2026 жылғы 1 маусымдағы жағдай бойынша мансап орталықтары арқылы 200,4 мың азамат жұмыспен қамтылды. Бұл көрсеткіштің ішінде 75 мыңы – жастар болса, 81 мыңы – нәзік жандылар, деп хабарлайды Kapital.kz іскерлік ақпарат орталығы Еңбек және халықты әлеуметтік қорғау министрлігіне сілтеме жасап.
Ведомство ақпаратына сәйкес, Қазақстанның еңбек нарығында оң үрдіс сақталуда. Жұмыспен қамтуға жәрдемдесу шаралары еліміздің барлық өңірлерін қамтып, халық табысының артуына және еңбек әлеуетінің нығаюына ықпал етуде. Ұлттық жобалар мен өңірлерді дамыту жоспарлары аясында биыл жалпы саны 40,4 мың жаңа жұмыс орнын құру жоспарланса, жылдың алғашқы жартысында-ақ 8 мыңға жуығы ашылған.
«ҚР Еңбек және халықты әлеуметтік қорғау министрлігі халықтың әлеуметтік осал санаттарын еңбек нарығына тарту бойынша жүйелі жұмыс жүргізіп, әр азаматтың қажеттілігіне сай жеке қолдау тетіктерін ұсынуда. Мәселен, мансап орталықтарының қызметімен 17,4 мың мүгедектігі бар азамат қамтылды. Олардың 6,4 мыңы жұмысқа орналастырылса, 3,8 мыңнан астамы кәсіпкерлік негіздеріне оқытылып, «Skills Enbek» онлайн-платформасы арқылы жаңа дағдыларды меңгерді», делінген ақпаратта.
Бұған қоса көпбалалы отбасыларды қолдау мәселесіне де ерекше назар аударылуда: мансап орталықтарына жүгінген 17,2 мың азаматтың 6,1 мыңы тұрақты және мемлекет субсидиялайтын уақытша жұмыс орындарына орналастырылды.
Еңбек нарығына бейімдеудің маңызды құралдарының бірі – кәсіби бағдарлау. Жыл басынан бері бұл қызметті 170,6 мың азамат пайдаланса, олардың 138 мыңы жұмыс іздеушілер қатарындағы адамдар.
«Аталған жұмыстың негізін 2024–2029 жылдарға арналған Еңбек нарығын дамыту тұжырымдамасы құрайды. Министрліктің стратегиялық мақсаты – 2029 жылға қарай сапалы жұмыс орындарының үлесін 45%-ға дейін жеткізу. Бұл бағыттағы оң өзгерістер нақты көрсеткіштерден де көрінеді. Егер 2024 жылы сапалы жұмыс орындарымен 2,47 млн адам қамтылса, 2026 жылы бұл көрсеткішті 3,08 млн адамға дейін жеткізу жоспарланып отыр», деп атап өтті министрлікте.
Сонымен қатар ведомство тұрақты жалақыны, қауіпсіз еңбек жағдайларын және әлеуметтік қорғалуды қамтитын осы тәсілдерді іске асыру елдегі әлеуметтік тұрақтылықты нығайтудың маңызды факторы болып табылатынын еске салды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
