• Басты бет
• Мемлекет
• АҚШ компаниялары қар жамылғысын авиациялық мониторингілеу бағдарламасын әзірлеуге жұмылдырылды

АҚШ компаниялары қар жамылғысын авиациялық мониторингілеу бағдарламасын әзірлеуге жұмылдырылды

Алғашқы кезеңде жұмыстар Жабай өзенінің алабында жүргізіледі

Америкалық Dynamic Aviation және Airborne Snow Observatories Inc. компаниялары тасқын қаупін ерте ескерту мақсатында қар жамылғысын авиациялық мониторингілеу бағдарламасын әзірлеуге қатысады. Су ресурстары және ирригация вице-министрі Аслан Абдраимов бұл мәселені аталған компания өкілдерімен кездесуде талқылады. Бұл туралы Kapital.kz іскерлік ақпарат орталығы ҚР Су шаруашылығы және ирригация министрлігінің баспасөз қызметіне сілтеме жасап хабарлайды.

Тараптар қар жамылғысын бақылау, көктемгі ағындыны болжау және тасқын қаупін алдын ала ескерту саласындағы ынтымақтастық келешегін қарастырды. Өзен алаптары бойынша деректер жинау, картографиялық материалдар мен талдау есептерін дайындау, сондай-ақ алынған ақпаратты министрліктің қолданыстағы модельдері мен ақпараттық жүйелеріне біріктіру үшін заманауи авиациялық технологияларды қолдану мүмкіндіктеріне ерекше назар аударылды.

Талқылау қорытындысы бойынша бағдарламаны кезең-кезеңімен — ауқымын біртіндеп ұлғайта отырып және Қазақстанның су ресурстарын басқару саласындағы ұзақ мерзімді міндеттерін ескере отырып іске асыру туралы шешім қабылданды. Бірінші кезеңде жұмыстар Жабай өзенінің алабында жүргізіледі. Мұнда авиациялық технологиялардың көмегімен қар жамылғысы жоғары дәлдікпен өлшеніп, алынған деректер министрліктің қолданыстағы модельдері мен жүйелеріне енгізіледі. Бұл әдістемені жетілдіруге, отандық мамандарды даярлауға және бағдарламаны басқа өңірлерге кеңейтудің қаншалықты тиімді екенін бағалауға мүмкіндік береді.

Келесі кезеңдерде модельдердің сапасын одан әрі арттыру, деректерді біріктіру және бірлескен техникалық әлеуетті дамыту мақсатында мониторинг пен болжау жұмыстары басқа да басым су жинау алаптары мен өңірлерде жүргізіледі. Ұзақ мерзімді перспективада су ресурстарын кешенді басқару, тасқын қаупін азайту, су қоймаларын тиімді пайдалану және климаттық тұрақтылықты арттыру үшін бұл мүмкіндіктерді Қазақстанның бүкіл аумағына енгізу көзделіп отыр.

Сонымен қатар тараптар қазақстандық мамандарды даярлау, деректерге қол жеткізу және оларды басқару, қатысушы ұйымдар арасындағы рөлдер мен жауапкершілікті бөлу, сондай-ақ жобаны іске асыруға қажетті техникалық және әкімшілік рәсімдерді талқылады.

«Қазақстан үшін тек заманауи деректерге ие болу ғана емес, сонымен бірге басқарушылық шешімдерді алдын ала қабылдауға, тасқын қаупін азайтуға және халықты, инфрақұрылым мен ауыл шаруашылығын қорғауды қамтамасыз етуге мүмкіндік бередін тиімді құралдың болуы маңызды», — деп атап өтті су ресурстары және ирригация вице-министрі Аслан Абдраимов.

Кездесу қорытынбысы бойынша тараптар бағдарламаны кезең-кезеңімен іске асыру және оны Қазақстан аумағында жүзеге асырудың ықтимал қадамдары бойынша келіссөздерді жалғастыруға уағдаласты.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз