• Басты бет
• Мемлекет
• Атырауда прокурорлар инвесторлардың құны 21 млрд теңге болатын жобаларын қорғап қалды

Атырауда прокурорлар инвесторлардың құны 21 млрд теңге болатын жобаларын қорғап қалды

Шаруаларға қарсы жолданған заңсыз талап арыздардың күші жойылып, 99 кәсіпкер үшін электр қуатының тарифі төмендетілді

Атырау облысы Махамбет ауданының прокуратурасы Инвесторлардың құқықтарын қорғау комитетімен бірлесіп, өңір үшін маңызы зор 3 инвестор мен 99 кәсіпкердің құқығын қорғады. Жобалардың жалпы құны 21 миллиард теңгені құрайды. Бұл туралы Kapital.kz іскерлік ақпарат орталығы ведомствоның баспасөз қызметіне сілтеме жасап хабарлайды.

Мұндай қолдаудың бір мысалы ретінде тауарлы балық өнімдерін шығаруды қолға алған «А-Дана» шаруа қожалығын айтуға болады. Уәкілетті органның прокуратурамен келіспестен, инвесторға заңсыз түрде 281 миллион теңге көлемінде талап арыз жолдағаны анықталды. Прокуратура араласқаннан кейін бұл заң бұзушылық жойылды. Сонымен қатар инвестордың кепілде тұрған мүлкі босатылып, кәсіпорынның үздіксіз жұмыс істеуіне және жобаны ары қарай жүзеге асыруына мүмкіндік туды.

Сондай-ақ «Atyrau-Chicken» ЖШС-не құс фабрикасының құрылысына қажетті санитарлық-эпидемиологиялық және ветеринариялық қорытындыларды алуға көмек көрсетілді. Кәсіпорын іске қосылған соң жылына 5 мың тоннаға дейін құс етін өндіре алады.

Тағы бір инвесторға құны 3,5 миллиард теңге болатын жылыжай кешеніне газ құбырын тарту үшін рұқсат құжаттарын рәсімдеуге қолғабыс жасалды.

Прокурорлық қадағалау шараларының нәтижесінде 99 кәсіпкер үшін электр энергиясының тарифі төмендетілді, сумен жабдықтау шарттарының талаптары реттеліп, мемлекеттік сатып алулар бойынша қарыздар қайтарылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз