Шетелдік туристер Қазақстанда QR-код арқылы төлем жасай алады
Қазақстандық төлем жүйесі өз сервистерін жаһандық UnionPay желісімен біріктіреді
Қазақстанның Ұлттық төлем корпорациясы (ҰТК) мен UnionPay International халықаралық алпауыты трансшекаралық QR-төлемдерді іске қосуға уағдаласты. Тараптар өз жүйелерін өзара кіріктіреді, деп хабарлайды Kapital.kz іскерлік ақпарат орталығының тілшісі ҰТК баспасөз қызметіне сілтеме жасап.
«Қазақстан Республикасы Ұлттық Банкінің Ұлттық төлем корпорациясы» China UnionPay ұйымының өнімдері мен қызметтерін халықаралық деңгейде дамытумен айналысатын жаһандық бөлімшесі – UnionPay International (UPI) компаниясымен өзара түсіністік туралы меморандумға қол қойылғанын мәлімдеді. Келісім Қазақстанның төлем жүйесін жаһандық UnionPay желісімен біріктіре отырып, QR-кодтар арқылы трансшекаралық мобильді төлемдерді ілгерілетуге бағытталған. Бұл саяхатшылар, бизнес пен тұтынушылар үшін Қазақстан мен Қытай арасында, сондай-ақ UnionPay сервистері жұмыс істейтін басқа да нарықтарда жылдам, қауіпсіз әрі тиімді QR-төлемдерін жасауға мүмкіндік береді», - делінген хабарламада.
ҰТК мен UnionPay QR-кодтарының өзара үйлесімді болуы үшін жүйелерін біріктіреді.
Пайдаланушылар Қазақстандағы миллиондаған сауда нүктесінде тауарлар мен қызметтер ақысын тікелей UPI сервистеріне қосылған банктердің мобильді қосымшалары арқылы төлей алады. Осылайша, UnionPay жүйесінің қытайлық және халықаралық пайдаланушылары Қазақстанның бөлшек сауда мен HoReCa саласынан бастап, туризм мен қызмет көрсету секторына дейінгі кең ауқымды сауда желісінде QR сканерлеп, төлем жасау мүмкіндігіне ие болады.
Құжатқа «ҰТК» АҚ басқарма төрағасы Жанар Самаева мен UnionPay International бас атқарушы директоры (CEO) Ван Лисинь қол қойды. Бұл серіктестік инфрақұрылымды кеңейтуге зор мүмкіндік беріп, трансшекаралық төлемдердің қолжетімділігін арттырады.
Техникалық интеграция, пилоттық жобалар және іске қосу мерзімдері туралы қосымша ақпарат жобаның жүзеге асырылу барысына қарай жарияланады.
Еске салсақ, 2024 жылы Қазақстанда екі банктің қатысуымен бірыңғай QR жүйесінің пилоттық режимі іске қосылған болатын. 2025 жылдың қарашасына қарай жүйеде алты банк жұмыс істеді. Сол кезде Ұлттық банк елдегі барлық банкпен бірыңғай QR-ды іске қосу бойынша келісімшарттарға қол қойылғанын мәлімдеген. 2026 жылдың бірінші тоқсанының соңына дейін барлық банктің клиенті бұл сервисті толыққанды пайдалана алады деп жоспарланған еді.
2026 жылдың наурыз айының басында Президент Қазақстанның ірі банктеріне ескерту жасады. Мемлекет басшысы бұл екінші деңгейлі банктердің банкаралық QR-төлемдерге, аударымдарға қосылуды, сондай-ақ цифрлық теңгемен есеп айырысуды кешіктіріп жатқанын атап өтті.
2026 жылдың сәуірінде Ұлттық банк төрағасы Тимур Сүлейменов Қазақстанда қолма-қол ақшасыз төлемдерге арналған бірыңғай банкаралық QR-код жүйесін іске қосуға дайындық жұмыстары жалғасып жатқанын хабарлады. Оның айтуынша, қазіргі уақытта банктер техникалық міндеттерді шешуге, соның ішінде берілетін деректердің қауіпсіздігін қамтамасыз етуге баса назар аударып отыр.
2026 жылдың мамырында Ұлттық банк төрағасының орынбасары Бинұр Жәленов нарықтың басқа қатысушылары сияқты Kaspi Bank те 2026 жылдың 19 шілдесіне дейін банкаралық QR-ға толық қосылуды қамтамасыз ететінін мәлімдеді.
2026 жылдың шілдесінде қазақстандықтар қай банктің қызметін пайдаланатынына қарамастан, сатып алған тауарлары үшін бірыңғай QR-код арқылы төлей алады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
