Президент Токио губернаторын қабылдады
Тараптар цифрлық технологиялар, халықаралық қаржы және білім беру салаларындағы серіктестік мүмкіндіктерін талқылады
Мемлекет басшысы Токио губернаторы Юрико Коикэні қабылдады, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.
Қасым-Жомарт Тоқаев Токио губернаторы Юрико Коикэнің сапары Қазақстан мен Жапония арасындағы кеңейтілген стратегиялық әріптестіктің орнағанына 10 жыл толуы қарсаңында өтіп отырғанын атап өтті.
Президент Юрико Коикэнің басшылығымен Токио әлемдегі ең қауіпсіз, ең таза әрі тиімді басқарылатын мегаполистердің бірі саналатынын айтты.
«Сізді жаһандық деңгейдегі көрнекті саясаткер ретінде танимыз. Көреген басшылығыңыз бен еліңіз үшін ұзақ жылдар бойы атқарған қызметіңіз құрметке лайық. Қазақстан жұртшылығы Сізді мемлекет қайраткері және еліміздің досы, серіктесі деп біледі. Қазақстанның тарихы мен мәдениетін дәріптеуге бағытталған еңбегіңізді жоғары бағалаймыз. Бұл қос халықтың ынтымағын арттыра түседі», – деді мемлекет басшысы.
Қасым-Жомарт Тоқаев былтыр Жапонияға жасаған ресми сапарын жылы еске алып, оның қорытындысында екіжақты қарым-қатынастар сапалық жаңа деңгейге көтерілгенін айтты.
«Мен Токионың «Ақылды қала» бағдарламасымен таныстым. Бұл біздің қызығушылығымызды тудырды. Себебі елімізде де Smart City тұжырымдамасын ілгерілетіп отырмыз. Сіздің Астанаға келген сапарыңыз пайдалы боларына сенімдімін. Өйткені біз ынтымақтастықты одан әрі нығайтуға және мегаполисті басқару тәжірибесін зерделеуге ынталымыз», – деді президент.
Токио губернаторы мемлекет басшысына жылы қабылдау көрсеткені үшін алғыс білдірді.
«Сіздің көшбасшылығыңызды, сондай-ақ экономикалық өсім, жасанды интеллект, цифрландыру және инвестиция тарту бағыттарын дамытуды көздейтін іргелі реформаларыңызды жоғары бағалаймын. Қазақстан өңірдегі экономикасы ірі, ресурсы мол ел ретінде Еуропа мен Азияны жалғайтын Орталық Азиядағы басты хаб рөлін нығайтып келеді», – деді Юрико Коикэ.
Тараптар сондай-ақ цифрлық технологиялар, халықаралық қаржы және білім беру секілді негізгі салалардағы серіктестік мүмкіндіктерін қарастырды.
Айта кетейік, мемлекет басшысы 2025 жылғы желтоқсанда Күншығыс еліне ресми сапармен барған болатын. Президент Жапония императорымен кездесіп, премьер-министр Санаэ Такаичимен келіссөз жүргізді, сондай-ақ «Орталық Азия – Жапония» саммитіне қатысты. Сапар аясында Қасым-Жомарт Тоқаев Юрико Коикэмен де кездесті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
