Су тұтынушылар «Қазсушарға» 966 млн теңгеден астам қарыз
Берешектің ең жоғары көлемі Түркістан және Қызылорда облыстарына тиесілі
Су тұтынушылардың Қазсушар РМК-на суаруға арналған су жеткізу қызметі үшін дебиторлық берешегі 966 млн теңгеден асты, деп хабарлайды Kapital.kz іскерлік ақпарат орталығының тілшісі ҚР су ресурстары және ирригация министрлігі баспасөз қызметіне сілтеме жасап.
«Кәсіпорын жүргізген түсіндіру жұмыстарының нәтижесінде берешек көлемі екі еседен астам қысқарды. 2025 жылдың соңында бұл көрсеткіш 2,13 млрд теңгені құраған еді», – деп хабарлады ведомство.
Қазіргі уақытта Қызылорда облысы бойынша берешек көлемі 251,3 млн теңгені, Түркістан облысы бойынша – 341,7 млн теңгені, Қонаев атындағы Үлкен Алматы каналы филиалы бойынша – 211,3 млн теңгені құрайды.
Сондай-ақ Жамбыл облысында берешек 94,65 млн теңге, Жетісу облысында – 44,9 млн теңге, Батыс Қазақстан облысында – 21,3 млн теңге, ал Шығыс Қазақстан облысында 1,4 млн теңге болған.
Қазсушар РМК су тұтынушылармен жаңа биллинг жүйесі арқылы электронды форматта келісімшарт жасайды. Жүйе функционалына сәйкес, егер тұтынушының 5 мың теңгеден асатын дебиторлық берешегі болса, жаңа келісімшарт жасауға автоматты түрде шектеу қойылады.
«Дебиторлық берешек суару маусымының тұрақты өтуіне кедергі келтіреді. Су жеткізу қызметінен түскен қаражат гидротехникалық құрылыстарды тазалау мен жөндеуге, жанар-жағармай және басқа да қажетті материалдарды сатып алуға жұмсалады. Сондықтан диқандарды қарыздарын мүмкіндігінше тезірек өтеуге шақырамыз», – деді Әнуар Үскенбаев.
Бұған дейін биылғы суару маусымында шамамен 11 млрд текше метр су алынатыны болжанғаны хабарланған. Еліміздің оңтүстік облыстары бойынша тұрақты суару лимиттері бекітілді.
Атап айтқанда, Қызылорда облысы үшін 3,2 млрд текше метр, Түркістан облысы үшін 3,8 млрд текше метр, ал Жамбыл облысы үшін 900 млн текше метр көлемінде лимит белгіленген.
Сонымен қатар Қазақстанда суару суын субсидиялау қағидаларын жаңарту жоспарланып отыр. Су үнемдеу жүйелерін енгізетін фермерлер көбірек өтемақы ала алады.
Мамандардың болжамынша, әсіресе Арал-Сырдария және Шу-Талас бассейндерінде су тапшылығы қаупі жоғары. Вегетациялық кезеңде тапшылық көлемі 1 млрд текше метрге жетуі мүмкін. Ал Еуразиялық даму банкі Орталық Азия алдағы бес жылда созылмалы су тапшылығына тап болуы ықтимал деп есептейді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
