• Басты бет
• Мемлекет
• ҚАӘ басшысы әуежай маңындағы қоқыс полигондары пен заңсыз құрылыс мәселесін көтерді

ҚАӘ басшысы әуежай маңындағы қоқыс полигондары пен заңсыз құрылыс мәселесін көтерді

Былтыр әуе кемелері 280 рет құстармен соқтығысқан, биылғы үш айда 33 оқиға тіркелген

Қазақстанның ірі әуежайларына іргелес аумақтарда ұшу қауіпсіздігіне қатер төндіретін заңсыз нысандар мен қоқыс полигондарының көбеюі белең алып отыр. Тек Алматы мен Шымкент әуежайларының маңынан 300-ден астам заңсыз нысан анықталған. Бұл туралы бүгін Үкімет отырысында «Қазақстанның авиациялық әкімшілігі» (ҚАӘ) Бас атқарушы директоры Майкл Дэниел мәлімдеді, деп хабарлайды Kapital.kz іскерлік ақпарат орталығының тілшісі.

Оның айтуынша, қазіргі уақытта әуежай маңындағы жерлерді мақсатсыз пайдалану және кедергілердің артуы басты проблеманың біріне айналған. Мәселен, Алматы әуежайының маңындағы аумақта шамамен 160 кедергі, айналасында орналасқан заңсыз нысандар, ал Шымкент әуежайы ауданында 150-ден астам кедергі анықталып отыр.

Бұдан бөлек, Атырау, Семей, Өскемен, Көкшетау, Балқаш және Үржар әуежайларына жақын орналасқан қоқыс үйінділері құстарды тартатындықтан, әуе кемелерінің соқтығысу қаупін айтарлықтай арттырып, авиакомпаниялар үшін пайдалану шектеулерін туғызып отырғанан атап өтте.. Ресми деректерге сүйенсек, 2025 жылы әуе кемелерінің құстармен соқтығысуының 280 жағдайы, ал ағымдағы жылдың бірінші тоқсанында 33 оқиға тіркелген.

ҚАӘ бұл мәселелерді шешу үшін арнайы аймақтандыру схемаларын әзірлеп, жергілікті билікке жолдағанымен, әкімдіктер тарапынан тиісті қолдау байқалмайтынын айтып отыр.

«Осы проблемаларды шешу үшін ҚАӘ приаэродромдық аумақтарды аймақтандыру схемаларын әзірлеп, әкімдіктерге жолдады. Алайда, көп жағдайда аймақтандыру схемалары осы уақытқа дейін елді мекендерді дамытудың бас жоспарларына енгізілмеген, бұл әуежайлардың маңында жаңа нысандар мен кедергілердің одан ары пайда болуына әкеп соғады. Жергілікті атқарушы органдармен өзара іс-қимылды күшейту талап етіледі, бұл өз кезегінде ұшу қауіпсіздігін қамтамасыз етудің және әуежайлардың тұрақты дамуының маңызды шарты болып қала береді», деді Майкл Дэниел.

Қауіпсіздік мәселелерімен қатар, Авиациялық әкімшілік өңірлік әуежайлардағы қызмет көрсету сапасын арттыруды да бақылауда ұстап отыр. Жолаушыларға бағытталған тәсілдерді дамыту мақсатында «Best Airport Service» бастамасы жүзеге асырылуда. Оның аясында тұрақты мониторинг жүргізіліп, ана мен бала бөлмелерінің жай-күйі тексеріледі.

Бұл бастама 2025 жылы Ақтау, Қостанай, Ақтөбе және Орал әуежайларын қамтыса, 2026 жылы Қарағанды, Семей және Қызылорда қалаларында іске асырылмақ. ҚАӘ жолаушылар құқығы бұзылған жағдайда сала өкілдеріне айыппұлдар салынатынын қатаң ескертті.

Дегенмен, елдегі кейбір өңірлік әуежайлардың даму деңгейі халықаралық сарапшылар тарапынан жоғары баға алып отыр. ҚАӘ басшысы Түркістан мен Шымкент қалаларындағы сервис сапасына қатысты жеке әсерімен бөлісті.

«Өзімнің жеке тәжірибеммен бөлісуге рұқсат етіңіздер. Түркістан мен Шымкент әуежайларына барған уақытымда жолаушыларға қызмет көрсету сапасына тәнті болдым. Менің ойымша, екі әуежай да Америка Құрама Штаттарындағы көлемі жағынан ұқсас әуежайлардың стандарттарына сәйкес келеді немесе олардан асып түседі», деді Майкл Дэниел.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз