Қазақстанда 7 авиакомпания мен 4 авиациялық оқу орталығының қызметі тоқтатылды
Қазіргі елде әуе кемелерін пайдаланатын 104 субъект жұмыс істейді
«Қазақстанның авиациялық әкімшілігі» АҚ (ҚАӘ) елдегі азаматтық авиация субъектілеріне жүргізілген ауқымды тексеріс қорытындысын жариялады. Бақылау-қадағалау шараларының нәтижесінде бірнеше әуе компаниясы мен оқу орталығының жұмысы шектелді. Бұл туралы Үкімет отырысында ведомствоның Бас атқарушы директоры Майкл Дэниел мәлім етті, деп хабарлайды Kapital.kz іскерлік ақпарат орталығының тілшісі.
Майкл Дэниелдің айтуынша, қазіргі уақытта Қазақстанда әуе кемелерін пайдаланатын 104 субъект жұмыс істейді. Ал мемлекеттік тізілімде 973 әуе кемесі тіркелген. Сонымен қатар, елімізде 25 әуежай, әуе кемелеріне техникалық қызмет көрсету және жөндеумен айналысатын 28 ұйым және 21 авиациялық оқу орталығы сертификатталған.
ҚАӘ басшысы 2025 жыл мен 2026 жылдың бірінші тоқсаны аралығында салада өте ауқымды қадағалау жұмыстары жүргізілгенін атап өтті. Осы кезеңде азаматтық авиация субъектілеріне 1202 тексеру жүргізіліп, 1234 сертификат пен куәлік берілген. Алайда тексеріс барысында бірқатар өрескел заңбұзушылықтар анықталды.
«Бақылау-қадағалау іс-шараларының нәтижесінде 7 авиакомпанияға қатысты пайдаланушы сертификаттарының қолданысын тоқтата тұру немесе кері қайтарып алу шаралары енгізілді, 4 авиациялық оқу орталығының қызметі және әуе кемелеріне техникалық қызмет көрсету мен жөндеу жүргізетін ұйымдардың 2 сертификатының қолданысы тоқтатылды», — деді Майкл Дэниел.
Бұдан бөлек, ведомство таратқан ақпаратқа сәйкес, елдегі 8 аэродромға қатысты 15 түрлі шектеу енгізілген. Авиациялық әкімшілік ұшу қауіпсіздігін қамтамасыз ету мақсатында бақылау шараларын алдағы уақытта да қатаң түрде жалғастыратынын жеткізді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
