Астанадан Франкфуртқа ұшқан Air Astana ұшағының қозғалтқышы істен шықты
Әуе кемесі Ақтөбедегі қосалқы әуежайға қонды
Air Astana компаниясының ұшағы қозғалтқыштарының бірі істен шығуына байланысты Ақтөбедегі қосалқы әуежайға қонуға мәжбүр болды. Авиациялық оқиғаны Көлік министрлігі зерттеп жатыр, деп хабарлайды Kapital.kz іскерлік ақпарат орталығы тиісті ведомствоның баспасөз қызметіне сілтеме жасап.
Ведомство мәліметінше, 2026 жылғы 8 мамырда Астана – Франкфурт бағыты бойынша KZR921 рейсін орындау кезінде «Air Astana» АҚ-ның EI-KGJ тіркеу нөмірлі Airbus A321 әуе кемесімен авиациялық оқиға орын алды.
«Астана әуежайынан ұшып шыққаннан кейін әуе кемесінің экипажы қозғалтқыштардың бірінің істен шығуына байланысты PAN-PAN шұғыл дабылын жариялады. Осыған байланысты экипаж Ақтөбе қаласының қосалқы әуежайына қону туралы шешім қабылдады», делінген министрлік хабарламасында.
Ұшақта 93 жолаушы, оның ішінде 4 бала мен 1 нәресте, сондай-ақ экипаждың 9 мүшесі болған.
«Әуе кемесі Ақтөбе әуежайына жергілікті уақыт бойынша сағат 11:34-те штаттық режимде қонды. Экипаж әуе кемесінің жедел пайдалану жөніндегі анықтамалығында (QRH – Quick Reference Handbook) көзделген рәсімдерге сәйкес әрекет етті. Қонғаннан кейін әуе кемесі тұрақ орнына өздігінен жетті. Қауіпсіздікті қамтамасыз ету мақсатында әуежайдың авариялық-құтқару және тиісті жерүсті қызметтері жұмылдырылды», деп қосты министрлікте.
Сонымен қатар ведомство авиациялық оқиға әуе кемесінің күштік қондырғысындағы техникалық ақауға байланысты болғанын атап өтті. Қазіргі уақытта зардап шеккендер немесе әуе кемесінің зақымдануы туралы ақпарат түскен жоқ.
Айта кетейік, ҚР Инвестициялар және даму министрінің 2017 жылғы 27 шілдедегі №505 бұйрығымен бекітілген авиациялық оқиғалар мен инциденттер туралы деректерді ұсыну және оларды тергеп-тексеру қағидаларына сәйкес аталған авиациялық оқиға ауыр инцидент ретінде жіктеліп, оны Қазақстан Республикасы Көлік министрлігінің Көліктегі оқиғалар мен инциденттерді тергеп-тексеру департаменті тергейтін болады.
Алғашқы іс-шараларды жүргізу және ақпарат жинау мақсатында департамент қызметкерінің авиациялық оқиға орнына баруы жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
