• Басты бет
• Государство
• 3,7 млрд теңге жымқырған дәрі дистрибьюторы анықталды

3,7 млрд теңге жымқырған дәрі дистрибьюторы анықталды

БАӘ арқылы жасалған схема негізінде дәрі бағасы жасанды түрде қымбаттатылған, дейді тергеу органдары

Қазақстанның Қаржылық мониторинг агенттігі Дюшенн бұлшықет дистрофиясын емдеуге арналған дәрілік заттарды сатып алу кезінде 3,7 млрд теңге жымқыру фактісі бойынша тергеуді аяқтады. Күдіктілер БАӘ-дегі компаниялар арқылы бағаны қолдан өсіріп, жымқырылған қаржыға жылжымайтын мүлік сатып алған, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.

Қаржылық мониторинг агенттігі дәрілік препараттарды сатып алу кезінде мүліктік залал келтіру фактісі бойынша тергеп-тексеруді аяқтады.

Тергеу мәліметіне сәйкес, «Интерфармсервис» ЖШС Қазақстан аумағында Дюшенн бұлшықет дистрофиясын емдеуге арналған дәрілік заттардың дистрибьюторы және жалғыз жеткізушісі бола отырып, бес жыл бойы оларды еліміздің медициналық ұйымдарына жеткізіп келген.

«Аталған препараттар бойынша өндіруші шекті сату бағаларын белгілеген. Алайда компания басшылығы заңсыз пайда табу мақсатында жеткізу тізбегіне Біріккен Араб Әмірліктерінде тіркелген өздеріне бағынысты компанияны қосып, сол арқылы жалған мәмілелер жүргізген. Осы схема арқылы препараттардың сату бағасы жасанды түрде өсіріліп, олардың нақты өзіндік құны жасырылып, заңсыз пайда алынған», деді ҚМА-да.

Агенттік нәтижесінде мемлекетке 3,7 млрд теңге көлемінде залал келтірілгенін атап өтті. Сонымен қатар алынған табысқа салық төлеуден жалтару мақсатында серіктестік басшылығы түрлі жеке кәсіпкерлермен жалған мәмілелер жасап, жалған шот-фактуралар рәсімдеу арқылы қаражатты шығару схемасын ұйымдастырған.

«Соның салдарынан 4 млрд теңгеден астам қаражат қолма-қол ақшаға айналдырылған. Компания 637 млн теңгеден астам салық төлеуден жалтарған. Заңсыз баю нәтижесінде кәсіпкерлер 32 пәтер, 11 автокөлік және 8 тұрғын үй сатып алған. Аталған мүлікке тәркілеу мақсатында тыйым салынды», деп қосты ведомствода.

Екі күдіктіге қатысты үйқамақ түріндегі бұлтартпау шарасы, үшінші тұлғаға қатысты кепіл түріндегі бұлтартпау шарасы қолданылды. Қазіргі уақытта тараптар қылмыстық іс материалдарымен танысуды бастады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз