Каналдарды, су қоймаларын және гидроторапты реконструкциялау көзделген

Қазақстанда гидротехникалық инфрақұрылым саласындағы ұзақ мерзімді 10 жобаны қайта жандандырып, аяқтау жоспарланып отыр, деп хабарлайды Kapital.kz іскерлік ақпарат орталығы су ресурстары және ирригация министрлігінің баспасөз қызметіне сілтеме жасап.

Ведомствоның мәліметінше, өткен жылы Су ресурстары және ирригация министрлігінің Су шаруашылығы комитеті гидротехникалық нысандарды салу және қайта жаңғырту бойынша ұзақ мерзімді жобаларды аяқтау алгоритмін әзірлеген.

«Аталған алгоритмге сәйкес, 2010-2020 жылдары басталған, бірақ аяқталмай қалған 10 жоба бойынша құрылыс-монтаж жұмыстарын қайта бастап, аяқтау жоспарланып отыр. Олардың қатарында Қызылорда және Түркістан облыстарында каналдарды реконструкциялау және жаңғыртуға арналған алты жоба, Ақмола облысында су қоймаларын қайта жаңғыртуға арналған екі жоба, Абай облысындағы бөгетті гидроторапты реконструкциялау, сондай-ақ Алматы облысындағы су алу құрылысын электрмен жабдықтау жобасы бар», – деп хабарлады ирригация министрлігі.

2025 жылы барлық нысандардың техникалық жағдайына тексеру жүргізіліп, орындалған және қалған жұмыстардың көлемі анықталды. Сонымен қатар мемлекеттік сәулет-құрылыс бақылау органдарының нұсқамалары алынып, жобалық-сметалық құжаттаманы түзетуге арналған техникалық тапсырмалар әзірленді. Түзету жұмыстарын осы жылдың бірінші жартыжылдығының соңына дейін аяқтау жоспарланған.

«Бұл жобаларды іске асыру гидротехникалық құрылыстарды қауіпсіз пайдалануды қамтамасыз етуге, апаттық тәуекелдердің алдын алуға, автоматтандырылған есепке алу жүйелерін енгізуге және су шығынын азайтуға мүмкіндік береді. Нәтижесінде ауыл шаруашылығы жерлерін сумен қамтамасыз ету жақсарып, өнімділік артып, өңірлердің әлеуметтік-экономикалық тұрақтылығы нығаяды», – деді су ресурстары және ирригация министрі Нұржан Нұржігітов.

Бұған дейін 2026 жылы Қазақстанда топтық су құбырларын жаңғырту бойынша 12 жоба іске асырылатыны хабарланған болатын. 2025 жылы топтық су құбырларын қаржыландыруға 70,2 млрд теңге бөлінетіні айтылды. Ал Қ. Сәтбаев атындағы каналдан Астанаға дейін су құбырын салу құны 1,3 млрд долларды құрайды.