Қазақстанда су тасқынына дайындық: 1,4 млн адамға арналған эвакуациялық орын әзірленді
ТЖМ 39 мыңнан астам құтқарушы мен 18 мың техника тасқын қаупі бар өңірлерге жұмылдырды
Қазақстанда көктемгі су тасқыны кезеңіне дайындық күшейтілді. Ел бойынша 1,4 млн адамды қабылдай алатын эвакуациялық орындар дайындалды, деп хабарлайды Kapital.kz іскерлік ақпарат орталығы.
Төтенше жағдайлар министрлігінің мәліметінше, ықтимал су тасқынына әрекет ету үшін 39 мыңнан астам адам мен 18 мыңнан астам техника мен арнайы құралдан тұратын күштер тобы жасақталған. Негізгі ресурстар қауіп деңгейі жоғары өңірлерде шоғырландырылады. Олардың қатарында Солтүстік Қазақстан облысы, Ақмола облысы, Қарағанды облысы, Шығыс Қазақстан облысы және Абай облысы бар.
Сондай-ақ ТЖМ қосымша резерв құрды. Оның құрамына 930 қызметкер, 113 техника, 35 жүзу құралы және 99 мотопомпа кіреді. Бұл күштер қажет болған жағдайда ең осал аудандарға жедел жіберіледі. Құтқару бөлімшелері үшін 842 бірлік арнайы техника, 27 жүзу құралы, шамамен 2 мың құтқару жабдығы және 10 әуе кемесі сатып алынған.
Су тасқыны кезіндегі әрекеттердің дайындық деңгейі «Көктем» республикалық командалық-штабтық оқу-жаттығуы барысында тексерілді. Жаттығу аясында халықты көшіру алгоритмдері мен уақытша орналастыру пункттерінің жұмысы пысықталған.
Ел бойынша 3 857 эвакуациялық пункт дайындалған. Олардың жалпы сыйымдылығы 1,4 млн адамнан асады.
Қазіргі уақытта ТЖМ жедел штабы тәулік бойы жұмыс істеп жатыр. Республика бойынша су тасқыны қаупі бар 1242 елді мекенге тұрақты мониторинг жүргізілуде, ал азаматтық қорғау қызметтері жоғары дайындық режиміне көшірілген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
