ІІМ қазақстандықтарды шетелдегі жалған жұмыс орындарынан сақтандырады

Қазақстанның Ішкі істер министрлігі қазақстандықтарды абай болуға және әлеуметтік желілер мен мессенджерлерде жоғары жалақылы жұмыс туралы күмәнді хабарландыруларға сенбеуге шақырады, деп хабарлайды Kapital.kz іскерлік ақпарат орталығы ІІМ баспасөз қызметіне сілтеме жасап.

«ІІМ Киберқылмыспен күрес департаменті азаматтарды интернет-хабарландырулар арқылы шетелде «жоғары жалақылы жұмысқа» тарту қаупі туралы ескертеді. Хабарландырулар көбінесе Telegram-арналар, WhatsApp-топтар және басқа да онлайн платформалар арқылы орналастырылады», – делінген хабарламада.

Министрліктің мәліметі бойынша, алаяқтар әлеуметтік желілерде, мессенджерлерде және хабарландыру сайттарында жоғары табыс, ұшақ билеті мен тұру шығындарының төленетінін, сондай-ақ тәжірибе мен тіл білуді қажет етпейтін жеңіл жұмыс ұсынысын таратады.

Азаматтар шетелге барған кезде келесі қауіптерге тап болуы мүмкін:

- төлқұжаттар мен басқа құжаттарынан айырылуы;

- еркін жүріп-тұруының шектелуі;

- интернет-алаяқтыққа қатысуға мәжбүр ету;

- жалақы төленбеуі;

- «босатылу» немесе туған жерге қайтарылу үшін ақша талап етілуі;

- психологиялық қысым және қауіп-қатер.

Ведомство келесі сақтық шараларын ұстануды ұсынады:

- шетелде жұмысты тек лицензияланған агенттіктер арқылы рәсімдеңіз;

- жұмыс беруші мен келісім шартты мұқият тексеріңіз;

- құжаттар мен жеке деректерді үшінші тұлғаларға бермеңіз;

- туыстарыңызды сапарлау жолыңыз бен орналасқан жеріңіз туралы хабардар етіңіз.

Күмәнді ұсыныстар немесе алаяқтық белгілері анықталған жағдайда, дереу құқық қорғау органдарына хабарласу ұсынылады.

«Абай болыңыздар және интернеттегі күмәнді ұсыныстарға сенбеңіздер», – деп ескертеді ведомство.

Бұған дейін Қонаевта Pre-departure Orientation Centre (PDO) – Шетелге шығуға дайындық орталығы ашылғаны хабарланған еді. Ол өңірлік Еңбек мобильділігі орталығы базасында жұмыс істейді және шетелге жұмысқа шығуды жоспарлаған қазақстандықтарға көмек көрсетеді.