Қазақстанда ерекше қорғалатын табиғи аумақтардың алаңын 33,2 млн гектарға дейін жеткізу жоспарлануда

2035 жылға қарай Қазақстанда ерекше қорғалатын табиғи аумақтардың алаңын 31 млн гектардан 33,2 млн гектарға дейін ұлғайту көзделген. Мұндай жоспарлар 2026-2035 жылдарға арналған Биологиялық әртүрлілікті сақтау және орнықты пайдалану тұжырымдамасында бекітілген. Құжатты үкімет қабылдады, деп хабарлайды Kapital.kz іскерлік ақпарат орталығы экология және табиғи ресурстар министрлігінің баспасөз қызметіне сілтеме жасап.

Сондай-ақ тұжырымдамада ормандарды қорғау мен молайтудың тиімділігін арттыру, орнықты орман пайдалануды дамыту жоспарланған.

Экология министрлігінің хабарлауынша, қолда бар ормандарды сақтай отырып және орман дақылдарын отырғызу көлемін арттыру арқылы елдің орманмен көмкерілген аумағын 14,7 млн гектарға дейін жеткізу жоспарлануда (қазіргі уақытта бұл көрсеткіш 13,9 млн гектарды құрайды).

Маңызды бағыттардың бірі – ағаш ресурстарын ұтымды пайдалану. Құжатта 2035 жылға қарай ағаш өңдеу саласы өнімдерінің өндірісін бес есеге арттыра отырып, отандық сүректі терең өңдеуді енгізу қарастырылған.

Жануарлар дүниесін мониторингілеу, қорғау және орнықты пайдалану жүйесін жетілдіру жоспарланған.

Қызыл кітапқа енген жануарларды сақтау және олардың орнықты өсімін қамтамасыз етуге, сондай-ақ аңшылық (оның ішінде трофейлік) нысандары болып табылатын жабайы жануарларды орнықты пайдалануға бағытталған бірқатар іс-шаралар жоспарланған.

Төртінші бағыт – ихтиофауна және табиғи балық ресурстары. Бұл мониторингті күшейтуді және барлық тәуекел түрлерін терең зерттеуді талап ететін салалар.

Бесінші және алтыншы бағыттар өсімдіктер дүниесі бойынша ауқымды жұмыстарды, сондай-ақ жайылымдардың тозуы сияқты өзекті мәселені қамтиды. Мониторинг, түгендеу және ғылыми негізделген озық шешімдерді қолдану – қолданыстағы сын-қатерлерге қарсы қойылатын негізгі тетіктер, деп түсіндірді ведомство.

Еске салайық, 2025 жылғы шілдеде Ақмола облысында орман қорының 100 гектардан астам жері мемлекет меншігіне қайтарылды.