ЕАДБ «Азық-түлік корпорациясына» 100 млн долларлық несие желісін ашпақшы
Қаржы ұлттық оператордың жобаларын іске асыруға, фермерлерді қолдауға және ауыл шаруашылығы дақылдарын сатып алуға бағытталады
«Азық-түлік корпорациясы» мен Еуразиялық даму банкі (ЕАДБ) 100 млн доллар көлемінде несие желісін ашу туралы келісімге қол қойды, деп хабарлайды Kapital.kz іскерлік ақпарат орталығы ұлттық компанияның баспасөз қызметіне сілтеме жасап.
Бөлінетін қаражат ұлттық астық операторының өз жобаларын іске асыруға, сондай-ақ фермерлерді қаржыландыруға, басым ауыл шаруашылығы дақылдарын өндіруді ынталандыруға және ішкі нарықты өсімдік шаруашылығы өнімдерімен тұрақты қамтамасыз етуге жұмсалуы мүмкін.
«Азық-түлік корпорациясы» басқарма төрағасының бірінші орынбасары Ильдар Исмағұловтың айтуынша, тартылатын қарыз ұлттық оператордың аграрлық секторды қолдау жөніндегі қаржылық мүмкіндіктерін кеңейтеді.
«ЕАДБ-ға стратегиялық әріптестігі үшін алғысымызды білдіреміз. Қаржыландыру бөлу туралы шешім «Азық-түлік корпорациясына» Қазақстанның ғана емес, бүкіл өңірдің азық-түлік қауіпсіздігін қамтамасыз ететін мемлекеттік институт ретінде сенім білдірілгенін көрсетеді», – деді ол халықаралық инвестициялар мен Еуразия өңірінің даму перспективаларына арналған бизнес-форум аясында өткен құжатқа қол қою рәсімінде.
ЕАДБ басқарма төрағасының орынбасары Руслан Дәленов бұл келісім «Азық-түлік корпорациясымен» ұзақмерзімді ынтымақтастықтың жалғасы екенін атап өтті.
«ЕАДБ үшін қатысушы елдердің экономикаларын тұрақты дамытуға, оның ішінде агроөнеркәсіптік кешенді қолдау арқылы ықпал ету маңызды», – деді ол.
Еске салайық, бұған дейін «Азық-түлік корпорациясы» 47,5 млрд теңгеге 380 мың тонна астық өткізу жөнінде келісімшарттар жасаған болатын. Бидай отандық ұн тарту кәсіпорындары мен құс фабрикаларына, сондай-ақ экспортқа жөнелтілуде. Сонымен қатар Қазақстан бір жыл ішінде астық пен ұн экспортын астық баламасында 11,7 млн тоннаға жеткізіп, 13,6%-ға арттырды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
