Кеңес Рақышев АХХО алаңында тағы бір активін тіркеді
Altaris Holding Ltd холдингтік қызметпен айналысады
Fincraft Group иесі Кеңес Рақышев «Астана» халықаралық қаржы орталығының (АХХО) алаңында жаңа компания – Altaris Holding Ltd-ны тіркеді деп хабарлайды Kapital.kz іскерлік ақпарат орталығының тілшісі АХХО-ның тәуелсіз реттеушісі – AFSA-ға сілтеме жасап.
Компания 2026 жылғы 24 маусымда Астанада тіркелген. Оның қызмет бағыты «холдингтік» деп көрсетілген. Компанияның бас атқарушы директоры болып Әнуар Жанғытаев тағайындалды. Kompra деректері бойынша, ол электр энергетикасы саласында жұмыс істейтін Schilling Ventures Ltd жеке компаниясының құрылтайшысы.
Altaris Holding Ltd құрылтайшылары – кәсіпкер Кеңес Рақышевке тиесілі Fincraft Energy Holding Limited және Alturion Holding Ltd.
Кеңес Рақышев Fincraft Group-тың еншілес ұйымы болып табылатын Fincraft Energy Holding Limited компаниясын АХХО алаңында 2025 жылғы 10 қарашада тіркеген болатын. Оның да қызметі «холдингтік» деп көрсетілген. Жаңа ұйымның жарғылық капиталы 50 миллион теңгені құрайды.
Бұл компания капитал нарығында жұмыс істеу және топтың мұнай-газ жобаларына инвестиция тартуды шоғырландыру үшін құрылған. Оның негізгі міндеті – қолданыстағы активтерді дамыту және көмірсутектерді барлау, өндіру әрі өңдеу саласындағы жаңа жобаларға қатысу.
Alturion Holding Ltd. де АХХО мүшесі, бұл актив 2026 жылғы 4 маусымда тіркелген. Оның қызметі AFSA сайтында «холдингтік» деп белгіленген. Құрылтайшысы – ALTURION FZCO компаниясы. LinkedIn желісіндегі парақшасындағы мәліметтерге сәйкес, бұл кәсіпорын Біріккен Араб Әмірліктерінде, Дубайда тіркелген. Ол басқарушылық консалтингпен айналысады, халықаралық компанияларға стратегиялық, операциялық және комплаенс қолдау көрсетуге маманданған.
Кеңес Рақышев өз қоржынынан тек тау-кен өндірісін ғана емес, қаржылық активтерді де біртіндеп шығарып, мұнай-газ саласына инвестиция құйып жатыр. 2024 жылдың қазан айында Kapital.kz тілшісімен әңгімелесу барысында кәсіпкер бұл Fincraft Group-тың стратегиясы екенін нақтылаған болатын.
«Біз сондай-ақ мұнай өнімдерінің әртүрлі түрлерін, яғни қосылған құны жоғары тауарларды алу үшін мұнайды терең өңдеуге баса назар аударғымыз келеді», - деп атап өткен еді ол.
Соңғы жария мәмілелердің бірі ретінде, 2025 жылдың наурызында Кеңес Рақышев «ARK Petroleum» ЖШС-ндегі үлесін сатты. Бұл кәсіпорын мұнай және ілеспе газ өндірумен айналысады және Маңғыстау облысындағы Шалва кен орнында мұнай барлау жұмыстарын жүргізу келісімшарты бойынша оператор. Бұған дейін кәсіпкер бұл компанияның 50 пайыздық үлесіне Fincraft Resources арқылы иелік еткен.
«25 пайыздық үлес «Hauling-1» ЖШС-не, қалған 25 пайызы «ЦЕНТР-ЭНЕРГО» ЖШС-не өткізілді», - деп түсіндірді Fincraft өкілдері.
Бұл активтегі үлестің қандай бағамен сатылғаны және мәміленің басқа мәліметтері белгісіз.
Сол жылдың қаңтар айында Кеңес Рақышевтың тағы бір активі – БТА (Украина) банкін украиналық кәсіпкерлер Вячеслав Мишалов пен Дмитрий Шевчуктің сатып алуды жоспарлап отырғаны белгілі болды. Бұл мәмілені Украинаның Антимонополиялық комитеті мақұлдап қойған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
