Тимур Турлов Freedom Bank-ті Пәкістан нарығына шығаруды көздеп отыр
Холдинг Африка нарығына да көз тігіп отыр
Freedom Bank Пәкістанда филиал ашуды жоспарлап отыр. Бұл туралы Freedom Holding Corp. басшысы Тимур Турлов онлайн-конференцияда мәлімдеді, деп хабарлайды Kapital.kz іскерлік ақпарат орталығының тілшісі.
«Біз қазір Пәкістан нарығына өте белсенді қарап жатырмыз, мен ол жаққа барып қайттым. Онда банкіміздің филиалын тіркеуді бастауды жоспарлап отырмыз. Бұл үлкен нарық, өте бай емес, бірақ өте жас. Менің ойымша, өте үлкен әлеуетке ие. Пәкістан халқы Қазақстан халқынан 10-12 еседен астам көп - 340 миллионнан асады. Пәкістанның ішкі жалпы өнімінің көлемі біздің елімізбен шамалас. Әрі цифрлық банкке (Пәкістанда) сұраныс жоғары болады, өйткені оның шығындары аз. Мысалы, біздің банктің бүкіл Қазақстан бойынша 20-дан сәл ғана асатын филиалы бар, біз бір клиентке жүздеген филиалы бар басқа ірі бөлшек сауда банктеріне қарағанда әлдеқайда аз жұмсаймыз», - деді Тимур Турлов.
Ол қазір Пәкістан нарығы «толығымен баламалы» – цифрлық емес екенін атап өтті.
«Пәкістан сияқты елде орташа жас 23 жас болса, бәрі жақсы болады (экономика мен банк бизнесінің дамуымен) деп сенеміз. Ал елдегі орташа жас 50 жас болғанда, экономиканың болашағы туралы айту қиын», - деді бизнесмен.
Ол сондай-ақ Африка нарығына да назар аударып отырғанын жеткізді.
«Бұл нарықты тиянақты зерттеп жатырмыз. Экспансия тұрғысынан біз бәрін бір уақытта істей алмайтынымыз анық», - деп есептейді Тимур Турлов.
Бизнесменнің айтуынша, холдинг болашаққа ауқымды мақсаттар қойып отыр.
«Біз АҚШ нарығында да ұсынылуы тиіс үлкен жаһандық цифрлық банк құруымыз керек. Ол жаққа, сірә, алдымен bank in the service моделі бойынша шығатын боламыз, американдық нарықта бұл тарихты өрістету үшін серіктестер іздейміз. Еуропалық Одақ бойынша қазір маңызды және қызықты жаңалықтар дайындап жатырмыз (бұл нарыққа қатысты жоспарлар бойынша). Еуропалық Одақ нарығына шығу барлық реттеуші процестерді аяқтағанға дейін 1,5-2 жыл уақытты алуы мүмкін. Қандай да бір серіктестіктер негізінде, соның ішінде Еуропалық Одақ нарығында суперап құруды бастаймыз деп үміттенеміз», - деп атап өтті холдинг басшысы.
Бизнесмен цифрлық банктің жаһандық болуы және іс жүзінде бүкіл әлемде филиалдары немесе еншілес банктері болуы керек екеніне сенімді.
«Бұл барлық цифрлық өнімдер арасында аман қалудың жалғыз жолы. Сіз Instagram және Google сервистерін пайдаланасыз және бүкіл әлем оларды пайдаланады. Іс жүзінде екінші Google жоқ, 1-2 компания нарықтың 70-80%-ын бақылайды. Жеңімпаз бәрін алады. Цифрлық банкпен де дәл солай болады. Бизнесті ауқымдау кезінде пайдаға, капиталға және өз қабілеттерімізге қарайтынымыз түсінікті. Егер біз қазір цифрлық банк тұрғызсақ, экспансиямызға тағы бірнеше жүз миллион доллар тарта аламыз – біздің өнімдеріміз тезірек ауқымдалады. Шын мәнінде, қазір уақыт онша көп емес. Қазір нарық әлі де өте бытыраңқы, ірі халықаралық цифрлық банктер іс жүзінде жоқ, өйткені реттеу күрделі», - деп түйіндеді Тимур Турлов.
Еске сала кетейік, холдинг шетелдік нарықтарға экспансияны біртіндеп жүзеге асырып жатыр.
2025 жылдың қаңтарында Freedom Holding Corp. еншілес компаниясы – Freedom Financial Services Inc. Түркияда брокерлік компания құратыны белгілі болды. Сонымен қатар сол жылдың қараша айында Қаржы нарығын реттеу және дамыту агенттігі «Фридом Банк Казахстан» (Freedom Bank) ұйымына Грузияда еншілес құрылым – «Фридом Банк Грузия» құруға рұқсат берді. Банкті «ФБГ Компани» (FBG Company) АҚ құру арқылы іске қосу жоспарланған болатын.
«Қазақстан мен Грузия реттеушілерімен келісілгеннен кейін бұл құрылымды коммерциялық Freedom Bank Georgia болып қайта құру жоспарлануда», - деп нақтылаған болатын бұдан бұрын Freedom Bank.
Холдингтің күтілетін мәмілелерінің бірі – түрік банкін сатып алу болып отыр. Бұл ниеті туралы 2025 жылдың желтоқсанында хабарланған еді. 2026 жылдың наурызында Freedom Holding реттеуші органдардың рұқсатын алғаннан кейін TurkishBank Group түрік бөлімшесінің акцияларының бақылау пакетін сатып алуға ниетті екені белгілі болды. Turkiye Today түрік басылымы жазғандай, түрік тарапының негізгі акционерлері Ozyol Holding және Кувейт ұлттық банкі (NBK), банктің капиталындағы 99,31% құрайтын өз үлестерін қазақстандық Freedom Holding-тің түрік еншілес компаниясы – Freedom Finansal Hizmetler AS-қа беруге келісті.
2026 жылдың сәуірінде Тимур Турловтың Францияда банктік лицензия алу мүмкіндігін зерттеп жатқаны белгілі болды. Frank Media басылымы Freedom Holding-тің бөлшек сауда банкін сатып алу туралы келіссөздер жүргізіп жатқанын жазды. Бұл туралы ақпаратты басылымға компанияның баспасөз қызметі растап, келіссөздердің алдыңғы қатарлы кезеңде тұрғанын көрсетті.
Freedom Holding Corp. холдингі АҚШ-та құрылған. Оның еншілес компаниялары бағалы қағаздармен брокерлік операцияларды жүзеге асырады, маркетмейкерлік қызметтер, инвестициялық-банктік қызметтер, сондай-ақ сақтандыру және төлем өнімдерін ұсынады.
Холдинг Қазақстан Республикасында телеком және медиа бизнестерге иелік етеді. Топтың бизнесі Қазақстан, Кипр, АҚШ, Ұлыбритания, Армения, БАӘ, Өзбекстан, Қырғызстан, Тәжікстан, Әзірбайжан және Түркия елдерін қамтиды. Холдингтің Австрия, Бельгия, Болгария, Франция, Германия, Грекия, Италия, Литва, Нидерланды, Польша және Испания елдерінде өкілдіктері бар.
Холдингтің жай акциялары Nasdaq, KASE және AIX биржаларында саудаланады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
