Alatau City-ді қарқынды дамыту: Президент заңнамалық жұмыстарды тездетуді тапсырды
Мемлекет басшысы жаңа қаланың дамуы үшін құқықтық базаны бір жыл ішінде қалыптастыру қажет екенін айтты
Президент Қасым-Жомарт Тоқаев Alatau City жобасын Қазақстан экономикасын жаңа сапалық деңгейге көтеретін стратегиялық бастама деп атап, жобаны іске асыруға қажетті заңнамалық жұмыстарды жеделдетуді тапсырды, деп хабарлайды Kapital.kz іскерлік ақпарат орталығының тілшісі Ақордаға сілтеме жасап.
Мемлекет басшысы жаңа қаланы салу туралы шешім ел экономикасы үшін күрделі кезеңде қабылданғанын, алайда жоба жан-жақты зерттеліп, халықаралық тәжірибе негізінде әзірленгенін айтты.
«Alatau City жобасы – шын мәнінде, жан-жақты зерделенді, пысықталды деп айтуға болады. Жалпы, әлемдік тәжірибеге қарайтын болсақ, дәл осы болашақ қалаларын салу арқылы ел дамуын жаңа сапалық деңгейге көтеруге зор мүмкіндік туады. Мысалы, Дубай, Шэньчжэнь, Инчхон және басқа да қалалардың табысты жобалары баршаға мәлім. Сол себепті біз де Alatau City жобасына зор үміт артып отырмыз», – деді Президент Алатау қаласын дамыту жөніндегі кеңесте сөйлеген сөзінде.
Тоқаевтың айтуынша, жобаның табысты жүзеге асуы үшін ең алдымен құқықтық, жер және инфрақұрылымдық мәселелер толық шешілуі қажет.
Президент арнайы құқықтық режимнің болуы өздігінен нәтиже бермейтінін ескертіп, мұндай жобалардың табысы сапалы институттар мен тұрақты заңнамалық ортаға тікелей байланысты екенін атап өтті.
«Біз Конституциялық заң арқылы қаланы қарқынды дамыту үшін мықты құқықтық негіз қаладық. Бірақ "арнаулы құқықтық режим бар, енді міндетті түрде табысқа жетеміз" деп ойлау қателік болар еді. Өйткені дәл осындай режим енгізілген экономикалық аймақтардың талай рет іс жүзінде нақты нәтиже бермегені белгілі», – деді Мемлекет басшысы.
Оның сөзінше, Alatau City-де бизнестің дамуына және тұрғындардың күнделікті өміріне қатысты барлық мәселелерді реттейтін ашық әрі түсінікті құқықтық жүйе қалыптастырылуы тиіс.
«Бұл жұмысты екі деңгейде атқару қажет. Біріншісі – негізгі қағидаларды белгілейтін конституциялық деңгей. Бұл мәселе өз шешімін тапты. Ал екіншісі – құқықтық реттеу деңгейі, яғни, экономикалық қызметтің әр саласы бойынша нақты заңнамалық тетіктер айқындалады», деп толықтырды сөзін президент.
Сонымен қатар Мемлекет басшысы реттеу актілерін әзірлеу кезінде халықаралық тәжірибесі мол шетелдік сарапшыларды тартудың маңызын да атап өтті.
Қала әкімдігі негізгі реттеуші құжаттарды бір жыл ішінде қабылдауды жоспарлап отыр. Осыған байланысты Тоқаев жауапты органдарға жұмысты созбалаңға салмауды тапсырды.
«Қаланы дамыту жөніндегі кеңес бұл істі мейлінше тез қолға алуы керек. Жұмысты соза беруге болмайды. Әйтпесе, инвестициядан құр қаламыз. Бизнес өкілдері де бізге сеніп отыр, сондықтан бұл жұмысқа нұқсан келтіруге болмайды. Халықаралық инвесторлар қолайлы жағдай жасайды деп, жылдар бойы күтіп отырмайды. Олар қай жерде мол мүмкіндік болса, соған сай бірден шұғыл шешім қабылдайды. Алатау жобасына қатысты заңнамалық жұмыс жылдам әрі сапалы жүргізілуге тиіс. Бұл – аса маңызды стратегиялық міндет», – деді Президент.
Мемлекет басшысының пікірінше, тиімді заңнамалық база құқықтық тұрақтылықты қамтамасыз етіп, инвесторлар үшін болжамды әрі тартымды орта қалыптастыруға мүмкіндік береді. Бұл өз кезегінде Alatau City-ді өңірлік және халықаралық инвестициялық орталықтардың біріне айналдыруға негіз болады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
