Президент Алматы облысын мақтады, бірақ Қонаев қаласын сынады
Қасым-Жомарт Тоқаев Қонаев қаласының келбетінде өзгеріс жоқ деп есептейді
Мемлекет басшысы Алматы облысының экономикалық өсімі мен инвестициялық белсенділігін оң бағалағанымен, өңірдегі бірқатар түйткілді мәселелерді, соның ішінде Қонаев қаласының даму қарқынын сынға алды, деп хабарлайды Kapital.kz іскерлік ақпарат орталығының тілшісі Ақордаға сілтеме жасап.
Президенттің сөзінше, Алматы облысының жалпы даму қарқыны жаман емес және өңірде тиісті жұмыстар атқарылуда.
«Былтыр өңірлік жалпы өнім көлемі 6,7 триллион теңге болып, 5,4 пайызға өсті. Қаңтар-сәуір айларындағы қысқа мерзімді экономикалық көрсеткіш бойынша аймақ 5 орында тұр. Инвестиция тарту жұмысы белсенді түрде жүргізіліп жатыр. Жыл басынан бері облыс экономикасына 266,2 миллиард теңге инвестиция салынды», деді Мемлекет басшысы Алатау қаласын дамыту жөніндегі кеңесте сөйлеген сөзінде.
Алайда, Қазақстан президенті өңірдің аграрлық сектордың әлеуеті әлі де толық игерілмей жатқанын атап өтті. Оның сөзінше, биылғы 4 айдың нәтижесі бойынша ауыл, орман және балық шаруашылығының нақты көлем индексі 101,2 пайыз болды.
Сонымен қатар Қасым-Жомарт Тоқаев өңірдегі олқылықтарды, оның ішінде Алматы облысының орталығы Қонаев қаласын сынға алды. Мемлекет басшысы шаһардағы инфрақұрылым құрылысының тым баяу жүріп жатқанына назар аударды.
«Қонаев қаласындағы инфрақұрылым құрылысы өте баяу жүргізіліп жатыр. «Баяғы жартас – сол жартас», қаланың келбеті – өзгеріссіз күйде. Бұл қалада шұғыл түрде театр, стадион, әкімшілік ғимараттары мен мектептер салу керек. Онсыз Алматы облысы өз аяғына тұрып кете алмайды. Облыс басшылығы осы өзекті мәселелерге баса назар аударуы қажет», деді президент.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
