Тимур Турлов активтерінің бірін АХҚО-да тіркеді

Freedom Holding Corp. құрамындағы Freedom Kazakhstan компаниясы Астана халықаралық қаржы орталығының (АХҚО) алаңында Freedom Media Group Ltd атты жаңа компанияны тіркеді. Бұл туралы Kapital.kz іскерлік ақпарат орталығы АХҚО-ның тәуелсіз реттеушісі – AFSA-ға сілтеме жасап хабарлады.

Компания АХҚО алаңында 2026 жылдың 24 ақпанында тіркелген. Оның негізгі қызметі «холдингтік компания» ретінде көрсетілген. Freedom Media Group Ltd-тің бас директоры және директоры болып Дмитрий Дворецкий тағайындалған. Ол сондай-ақ Freedom Media бақылау кеңесінің төрағасы қызметін атқарады.

Холдингтің баспасөз қызметі жаңа компанияның не үшін құрылғанын түсіндірді. Олардың мәліметінше, Freedom Holding Corp. алдағы уақытта Freedom SuperApp экожүйесін күшейтуге бағытталған медиа өнімдерді кеңейтіп, дамыту мүмкіндігін қарастырып отыр. Қазіргі таңда жаңа бағыттар пысықталу кезеңінде, ал атқарылып жатқан қадамдар холдинг құрылымын оңтайландырып, стратегиялық мақсаттарды жүзеге асыруға бағытталған.

Айта кетейік, холдингке тиесілі Freedom Media стримингтік платформасы Freedom Telecom компаниясының еншілес ұйымы болып саналады. Платформа 2024 жылы іске қосылған. Қызмет пайдаланушыларға 100-ден астам телеарнаны, сондай-ақ әлемдік студиялардың фильмдері мен сериалдарын (Disney, Sony, BBC) және жергілікті контентті ұсынады.

Бұған дейін Freedom Media жобасына алдағы бес жыл ішінде шамамен 54 млн доллар көлемінде инвестиция салу жоспарланғаны хабарланған еді. Кейінірек холдингтің негізін қалаушы Тимур Турлов медиаплатформаға бес жылда шамамен 50 млн доллар инвестиция құйылатынын айтқан. Қаражаттың бір бөлігі Paramount, Sony, Disney, Warner, NBC Universal және басқа да ірі студиялардан контент сатып алуға бағытталмақ. Бұл компаниялармен тиісті келісімшарттар жасалған. Жоспар бойынша стримингтік сервис 2027 жылдан бастап табыс әкеле бастайды.

Freedom Holding Corp. компаниясын кәсіпкер Тимур Турлов 2008 жылы құрған. Алғашында холдинг америкалық қор нарықтарына қолжетімділік ұсынуға маманданған. Кейін ол бас кеңсесі Алматыда орналасқан халықаралық қаржылық экожүйеге айналды.

Холдинг АҚШ-та құрылған. Оның еншілес компаниялары бағалы қағаздармен брокерлік операциялар жүргізіп, маркетмейкинг қызметін, инвестициялық-банктік қызметтерді, сондай-ақ сақтандыру және төлем өнімдерін ұсынады. Сонымен қатар топ Қазақстанда телекоммуникация және медиа бизнеске де иелік етеді.

Компаниялар тобының қызметі Қазақстан, Кипр, АҚШ, Ұлыбритания, Армения, БАӘ, Өзбекстан, Қырғызстан, Тәжікстан, Әзербайжан және Түркия елдерін қамтиды. Бұдан бөлек, Аустрия, Бельгия, Болгария, Франция, Германия, Грекия, Италия, Литва, Нидерланд, Польша және Испанияда өкілдіктері бар.

Freedom Holding Corp. компаниясының жай акциялары Nasdaq, KASE және AIX биржаларында саудаланады.