Ескі 10 мыңдық купюралардың айналым мерзімі 2027 жылға дейін ұзартылды
Ұлттық банк банктердің өтініші бойынша банкноттарды айналымда қалдыруға шешім қабылдады
Қазақстанда ескі 10 мың теңгелік банкноттарды пайдалану мерзімі тағы бір жылға ұзартылмақ. Бұл туралы Ұлттық банктің төрағасы Тимур Сүлейменов брифингте айтты, деп хабарлайды Kapital.kz іскерлік ақпарат орталығы.
Оның айтуынша, бұл мәселе бойынша екінші деңгейлі банктер Қазақстан қаржыгерлер қауымдастығы арқылы Ұлттық банкке өтінішпен жүгінген. Қаржы ұйымдары халық пен бизнес арасында бұл банкноттарға сұраныстың жоғары екенін атап өткен.
«Біз айналым мерзімін тағы бір жылға ұзартуды жоспарлап отырмыз. Бұл купюраларға сұраныс өте жоғары, және бұл туралы бізге Қазақстан қаржыгерлер қауымдастығы арқылы екінші деңгейлі банктер өтінішпен жүгінді», – деді Тимур Сүлейменов.
Бұған дейін ескі 10 мың теңгелік банкноттардың айналым мерзімі 2026 жылдың маусымында аяқталуы жоспарланған болатын. Енді Ұлттық банктің басшысының айтуынша, олардың пайдалану мерзімі 2027 жылдың маусымына дейін ұзартылды.
Сонымен қатар, Ұлттық банк бұрын хабарлағандай, «Сақ стилі» жаңа сериядағы банкноттары толықтай айналымға енгізілген. Тек 20 мың теңгелік купюра әзірге шықпайды, оны 2026 жылдың соңында шығару жоспарланып отыр.
2023 жылғы 15 қарашада Қазақстан қаржыгерлерінің XI конгрессінде Ұлттық банк ұлттық валютаның жаңа сериясын таныстырған болатын. Жаңа банкноттар «Сак стилінің» элементтері негізінде жасалған. Банкноттар өндірілуіне қарай айналымға біртіндеп енгізіліп отыратыны айтылған болатын. 2023 жылдың 25 желтоқсанынан бастап 5 мың теңгелік банкноттар, 2024 жылдың 28 маусымынан – 10 мың теңгелік, 2024 жылдың 25 желтоқсанынан – 2 мың теңгелік банкноттар айналымға шықты. 2 мың теңгелік купюралар кең көлемде 2025 жылдың екінші тоқсанында енгізілді.
Айта кетейік, «Сақ стилі» сериясындағы банкноттар әлемде алғаш рет жаңа қорғаныш элементтерімен жасалған. Оның ішінде микроптикалық екі түсті қорғаныш жіпті және сақ қорғандарынан табылған артефакттардың көлемді бейнелері бар. Жаңа сериядағы 10 мың теңгелік банкнот High Security Printing халықаралық байқауында «2024 жылғы ең үздік жаңа банкнот» номинациясын жеңіп алған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
