Депутат автосақтандыруда келтірілген зиянды тәуелсіз бағалау жүйесін енгізуді ұсынды

Депутат Нұрсұлтан Байтілесов Қазақстандағы міндетті автосақтандыру жүйесін реформалау және тәуелсіз зиян бағасын енгізу ұсынысын жасады. Бұл туралы ол Қаржы нарығын реттеу және дамыту агенттігінің төрайымы Мәдина Абылқасымоваға жолдаған ресми сұрауында хабарлады, деп жазады Kapital.kz іскерлік ақпарат орталығының тілшісі.

Депутаттың пікірінше, қазіргі қолданыстағы тәжірибе азаматтардың құқықтарын шектейді.

«Сақтандырушы бір мезгілде өтемақыны да төлейді және оның мөлшерін анықтауға да қатысады. Соның салдарынан зардап шеккендер сақтандырушының есебіне келісуге немесе қосымша рәсімдер жүргізуге мәжбүр болады. Ал бұл әрдайым келтірілген зиян көлеміне сәйкес келмейді», – деді Нұрсұлтан Байтілесов.

Сұрауда атап өтілгендей, «Көлік құралдарының иелерінің азаматтық-құқықтық жауапкершілігін міндетті сақтандыру туралы» заң қолдану тәжірибесінде жүйелі проблема бар. Бұл азаматтардың мүліктік құқықтарына әсер етіп, міндетті автосақтандыру институтына деген сенімді төмендетеді.

Депутат мәселенің заңда емес, заңды іс жүзінде жүзеге асыру механизмінде екенін айтты. Заңның 22-бабына сәйкес, зиян көлемін сақтандырушы немесе оның тартқан бағалаушысы анықтайды. Тәуелсіз бағалау тек сақтандырушы белгіленген мерзімдерді бұзған жағдайда ғана мүмкін болады. Байтілесов бұл модель «мүдделер қақтығысы қаупін тудырып, зардап шегушіні теңсіз жағдайда қалдырады» деп санайды.

«Нәтижесінде сақтандырушы бір мезгілде төлем жасау міндетін атқарады, зиян көлемін анықтау рәсіміне қатысады, ал бағалау құралдары мен талаптарын уәкілетті орган белгілейді», – деді депутат.

Осыған байланысты Нұрсұлтан Байтілесов қазіргі нормативтік актілер мен сақтандыру есеп-қисабын реттеу тәсілдерін қайта қарауды ұсынды. Тәуелсіз зиян бағасын енгізу сақтандыру қатынастарының барлық қатысушыларының мүдделерін теңестіруге мүмкіндік береді.

Бұған дейін Алматыда жыл сайынғы Қазақстандық сақтандыру форумы (KIF) өткен болатын. Шараға 27 елдің өкілдері мен отандық сақтандырушылар қатысты. Форумның басты тақырыптары – автосақтандыру, тарифтер мен төлемдердің перспективалары болды. Сонымен қатар, Қаржы нарығын реттеу және дамыту агенттігі автосақтандыру нарығында бәсекелестікті дамытуға кедергі болатын мәселелерді анықтады.