• Басты бет
• Экономика
• Қазақстанда америкалық Valley жаңбырлатып суару машиналарының өндірісі жолға қойылады

Қазақстанда америкалық Valley жаңбырлатып суару машиналарының өндірісі жолға қойылады

Қарағанды облысында жылына 300–500 суару машинасын шығару жоспарланып отыр

Қарағанды облысында америкалық Valley компаниясының жаңбырлатып суару машиналарын өндіру жоспарланып отыр. Жоба Осакаров ауданына жұмыс сапары барысында облыс әкімі Ермағанбет Бөлекпаевқа таныстырылды, деп хабарлайды Kapital.kz іскерлік ақпарат орталығы облыс әкімдігінің баспасөз қызметіне сілтеме жасап.

«Біз «Имсталькон» зауыты және Valley компаниясымен Қарағанды облысының аумағында жаңбырлатып суару машиналарын өндіруді жергіліктендіру туралы келісімге қол қойдық. Бұл отандық ауыл шаруашылығы тауарын өндірушілерді заманауи техникамен, қосалқы бөлшектермен және сапалы сервистік қызмет көрсетумен қамтамасыз етуге мүмкіндік береді», – деді «Евразия Инвест LTD» компаниясының құрылтайшысы Иван Георгиади.

Оның айтуынша, компания суармалы егіншілікті дамыту бағдарламасын жалғастырып жатыр. Биыл суармалы жер көлемін 10 мың гектарға дейін ұлғайту жоспарланған. Қазір егіс алқаптарына Valley компаниясының заманауи жаңбырлатып суару машиналары орнатылуда. Жобаны іске асыруға қажетті негізгі материалдар Қарағанды облысынан сатып алынады, ал құрылыс-монтаж жұмыстарын жергілікті мердігер ұйымдар орындайды.

Өңір басшысына сондай-ақ Valley компаниясының суару жүйесін басқаруға арналған цифрлық платформасы таныстырылды. Жасанды интеллект, спутниктік мониторинг және егістік алқаптарындағы датчиктердің көмегімен жүйе нақты уақыт режимінде суару процесін бақылайды. Ол топырақ пен өсімдіктердің жай-күйін талдап, дақылдардың ылғалға қажеттілігін есептеп, суару бойынша ұсынымдар береді.

Сонымен қатар облыс басшылығына астық қабылдау және сақтау инфрақұрылымын дамыту жобалары таныстырылды. Родниковское ауылындағы жұмыс істеп тұрған элеватордың сақтау қуатын 50 мың тоннаға дейін ұлғайту, ал Молодежный кентінде дәл осындай қуаттағы жаңа элеватор салу жоспарланған. Бұл нысандар астық пен майлы дақылдарды қабылдау, кептіру, тазарту және сақтауды қамтамасыз етеді.

Бұдан бөлек, компания картоп егістігінің көлемін 900 гектарға дейін ұлғайтып, Родниковское ауылы мен Молодежный кентінде көкөніс сақтау қоймаларының құрылысын жалғастырып жатыр. Биыл жалпы сыйымдылығы 46 мың тоннаны құрайтын алты кешен салу көзделген.

Облыс әкімі заманауи тауарлы-сүт фермасының құрылысымен де танысты. Иван Георгиадидің айтуынша, құрылыстың бірінші кезеңі аяқталған, қазір нысан алғашқы мал басын қабылдауға дайындалып жатыр. Мұнда агроөнеркәсіптік кешенді басқарудың бірыңғай цифрлық орталығы құрылады. Жүйе егіс жұмыстарынан және суарудан бастап сүт өндіруге дейінгі өндірістік циклдің барлық кезеңін нақты уақыт режимінде біріктіріп, цифрлық деректер негізінде басқаруға мүмкіндік береді. Бұл кәсіпорын жұмысының тиімділігін арттырады.

Бұған дейін премьер-министрдің орынбасары – ұлттық экономика министрі Серік Жұманғарин Valmont Industries компаниясының делегациясымен кездесуде суармалы жерлердің көлемін ұлғайту агроөнеркәсіптік кешендегі мемлекеттік саясаттың басым бағыттарының бірі екенін айтқан болатын.

«Еліміздің ауыл шаруашылығы жерлерінің әлеуетін және Мемлекет басшысының суармалы жер көлемін ұлғайту жөніндегі тапсырмасын ескерсек, заманауи ирригациялық техниканы өндіруді дамыту біз үшін ерекше маңызды. Valmont Industries жобасы практикалық тұрғыдан қызығушылық тудырады және отандық аграршыларды қажетті техникамен қамтамасыз ету мерзімін едәуір қысқартады», – деген еді Серік Жұманғарин.

Осы жылдың сәуір айында жобаның өндірістік қуаты жылына 300–500 жаңбырлатып суару машинасын құрайтыны хабарланған болатын. Жобаның жалпы инвестиция көлемі – 17 млн доллар.

Сонымен қатар Қытай инвесторларының консорциумы Таразда су ресурстары мен ирригациялық жүйелерді басқаруға арналған смарт-технологиялар өндірісін іске қосуды жоспарлап отыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз