Қазақстан Шахид Раджаи портындағы терминал құрылысына жер телімін 27 жылға алды
Логистикалық хабты екі жыл ішінде салу жоспарланып отыр
Қазақстан мен Иран Бендер-Аббас қаласындағы Шахид Раджаи портында қазақстандық көлік-логистикалық терминал салуға арналған жер телімін беру туралы BOT (Build-Operate-Transfer – салу, пайдалану және беру) келісіміне қол қойды. Бұл туралы Kapital.kz іскерлік ақпарат орталығы сауда және интеграция министрлігінің баспасөз қызметіне сілтеме жасап хабарлайды.
Келісім 27 жыл мерзімге жасалды. Оның ішінде екі жыл терминал құрылысын жүргізуге, ал кейінгі 25 жыл нысанды пайдалануға арналған. Терминалды коммерциялық пайдалануға беру жобаны іске асырудың үшінші жылына жоспарланған.
«Бұл жобаның жүзеге асырылуы Қазақстан мен Иран арасындағы көлік-логистикалық ынтымақтастықты дамытудың маңызды кезеңі болмақ. Иранның ең ірі портында қазақстандық терминалдың салынуы «Солтүстік – Оңтүстік» халықаралық көлік дәлізінің транзиттік әлеуетін нығайтып, логистикалық бағыттардың тұрақтылығын арттыруға, сондай-ақ Парсы шығанағы, Оңтүстік және Оңтүстік-Шығыс Азия, Шығыс Африка елдерінің нарығына тиімді шығу арқылы қазақстандық өнім экспортының географиясын кеңейтуге мүмкіндік береді», – делінген министрлік ақпаратында.
Еске салайық, 2026 жылғы 17 маусымда Иран Қазақстанға Шахид Раджаи портынан жер телімін бөлу мәселесін келісуді аяқтағаны хабарланған болатын. Сонымен қатар Иран Қазақстанға Чабахар портында жұмыс істеу мүмкіндігін ұсынуға дайын екенін растады. Өз кезегінде Қазақстан Иран тарабына Ақтау және Құрық порттарындағы айлақтарды, терминалдар мен порт инфрақұрылымын пайдалану мүмкіндігін қарастыруға дайын екенін мәлімдеді.
2025 жылдың қорытындысы бойынша «Солтүстік – Оңтүстік» халықаралық көлік дәлізі арқылы жүк тасымалының көлемі 12%-ға өсіп, 3,5 млн тоннаға жетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
