Қазақстан жанар-жағармайды заңсыз әкетуге қарсы бақылауды күшейтіп жатыр
Елде жанар-жағармайдың «сұр» экспортын тоқтатуға бағытталған шаралар күшейтілуде
Қазақстанда жанар-жағармай материалдарын (ЖЖМ) ел аумағынан заңсыз әкетуге қарсы күрес шаралары күшейтіліп жатыр. Бұл бағытта қолданылып жатқан бақылау тетіктері туралы үкіметтегі брифингте энергетика вице-министрі Қайырхан Тұтқышбаев айтып берді, деп хабарлайды Kapital.kz іскерлік ақпарат орталығы.
Оның айтуынша, шекара маңындағы аумақтарда шектеу шаралары кешені қазірдің өзінде қолданылады. Олар мемлекеттік шекарадан өтуді бақылауды және жанармайдың «сұр» экспортын ұйымдастыру схемаларын анықтауды көздейді.
«Қазіргі таңда шекаралас мемлекеттердің жүк және жеңіл автокөліктері Қазақстан аумағына тәулігіне бір реттен артық кіре алмайды деген талап қолданыста», – деді Қайырхан Тұтқышбаев.
Оның сөзінше, белгіленген талаптарды айналып өтіп, жанар-жағармайды заңсыз әкету үшін пайдаланылатын қосымша жанармай бактарымен жабдықталған көліктерге ерекше назар аударылып отыр.
«Қазір негізгі жұмыс қосымша жанармай бактарымен жабдықталған және отынды «сұр» жолмен әкету үшін пайдаланылатын көліктерді анықтауға бағытталған. Бұл жұмысты Ішкі істер министрлігі, Қаржылық мониторинг агенттігі, Шекара қызметі және кеден органдары бірлесіп жүргізіп жатыр», – деді вице-министр.
Сондай-ақ ол шекаралас өңірлерде жанармайды заңсыз әкетуге әрекет жасаған құқық бұзушылар тұрақты түрде анықталып жатқанын атап өтті.
«Бүгінде Қазақстаннан жанар-жағармайдың «сұр» жолмен әкетілуінің алдын алуға бағытталған кешенді шаралар қолданыста», – деп түйіндеді Қайырхан Тұтқышбаев.
Айта кетейік, бүгін вице-министр Ресейдегі Омбы мұнай өңдеу зауытының ұшқышсыз ұшу аппараттарының шабуылынан кейін жұмысының тоқтауы Қазақстанды жанармаймен қамтамасыз етуге қауіп төндірмейтінін де мәлімдеді.
Бұған дейін Қазақстан Еуразиялық экономикалық одаққа кірмейтін елдерден импортталатын жанар-жағармай материалдарына салынатын импорттық баж салығын уақытша нөлге дейін төмендету мүмкіндігін қарастырып жатқаны хабарланған болатын. Бұл ретте негізгі назар Қытайдан жеткізілетін өнімге аударылып отыр.
Сонымен қатар премьер-министр Олжас Бектенов шекарадағы бақылауды күшейтіп, елде жанармай тапшылығына жол бермеу үшін барлық қажетті шараларды қабылдауды тапсырған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
