Олжас Бектенов газ өңдеу зауыттарының құрылысын апта сайын бақылауды тапсырды
Премьер-министрдің айтуынша, бұл жобалардың табысты жүзеге асуы еліміздің энергетикалық қауіпсіздігіне тікелей әсер етеді
Премьер-министр Олжас Бектенов энергетика министрлігіне, «Самұрық-Қазына» қорына және QazaqGaz ұлттық компаниясына Қашаған, Қарашығанақ және Жаңаөзендегі газ өңдеу зауыттарының құрылыс-монтаж жұмыстарына апта сайын бақылау жүргізу жүйесін енгізуді тапсырды. Бұл жобалар ішкі нарыққа арналған тауарлық газ өндірісін ұлғайтып, мұнай-газ химиясы саласының дамуына серпін беруі тиіс, деп хабарлайды Kapital.kz іскерлік ақпарат орталығы үкіметтің баспасөз қызметіне сілтеме жасап.
«Барлық жобаның табысты іске асырылуы мемлекеттің энергетикалық қауіпсіздігіне, экономиканың инвестициялық тартымдылығына және азаматтардың өмір сүру сапасына тікелей әсер етеді. Экономиканың дамуы халық пен өнеркәсіп тарапынан газға деген сұраныстың тұрақты өсуімен қатар жүріп жатыр. Сондықтан саланың ресурстық мүмкіндіктері мен экономиканың қажеттіліктері арасында ұзақ мерзімді теңгерімді қамтамасыз етуіміз қажет. Газ тасымалдау инфрақұрылымын дамыту, газ өңдеу зауыттарын салу және өңірлерді газдандыру жобалары кезең-кезеңімен жүзеге асырылып келеді. Газ саласы озық қарқынмен дамуы тиіс. Жаңа кәсіпорындарды іске қосу, инвестиция тарту және елдің өнеркәсіптік әлеуетін одан әрі арттыру үшін қажетті инфрақұрылым уақытылы дайын болуы керек. Осыған байланысты Қашаған, Қарашығанақ кен орындары мен Жаңаөзен қаласындағы жаңа газ өңдеу қуаттарын салу жобалары ерекше маңызға ие. Сондықтан Энергетика министрлігіне, «Самұрық-Қазына» қорына және QazaqGaz компаниясына аталған нысандардағы құрылыс-монтаж жұмыстарына апта сайын бақылау жүргізу жүйесін енгізуді тапсырамын», – деді Олжас Бектенов.
Еске салайық, бұған дейін қуаттылығы жылына 1 млрд текше метр болатын Қашаған газ өңдеу зауыты құрылысының орындалу деңгейі 61,4%-ға жеткені, ал негізгі жабдықтарды жеткізу 98%-ға аяқталғаны хабарланған болатын.
Сондай-ақ 2025 жылдың желтоқсанында Қарашығанақ газ өңдеу зауытын салу жобасына қытайлық CITIC Construction компаниясы қатысатыны белгілі болды. Бұған дейін Қазақстан кен орнын игеруші Eni және Shell компанияларымен газ өңдеу зауытын салу мәселесі бойынша келіссөздер жүргізген. Алайда халықаралық консорциум жоба құнын едәуір ұлғайтуды талап еткендіктен, қазақстандық тарап бұл шарттармен келіспеген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
