Қашағандағы газ өңдеу зауытының құрылысы 2026 жылдың соңына дейін аяқталады
Жобаның орындалу деңгейі 61,4%-ға жетті, негізгі жабдықтың 98%-ы жеткізілген
Қуаттылығы жылына 1 млрд текше метр болатын Қашаған кен орнындағы газ өңдеу зауытының құрылысы 61,4%-ға аяқталды, ал негізгі жабдықтарды жеткізу 98%-ға орындалды. Бұл туралы үкімет отырысында «QazaqGaz» ҰК» АҚ басқарма төрағасы Әлібек Жамауов мәлім етті, деп хабарлайды Kapital.kz іскерлік ақпарат орталығы үкіметтің баспасөз қызметіне сілтеме жасап.
Оның айтуынша, құрылыс алаңында тәулік бойы 1 775 жұмысшы мен 314 арнайы техника жұмылдырылған. Бұл құрылыс-монтаж жұмыстарын 2026 жылдың соңына дейін толық аяқтауға мүмкіндік береді.
Сонымен қатар ұлттық компания басқа да ірі инфрақұрылымдық жобаларды іске асырып жатыр. «Бейнеу – Бозой – Шымкент» магистральдық газ құбырының екінші желісінің құрылысы бойынша базалық жобалау жұмыстары 100%-ға, инженерлік ізденістер 98%-ға аяқталды, ал жобалаудың жалпы дайындық деңгейі 35,56%-ды құрайды.
Жабдықтарға тапсырыс беріліп қойған. Құбырлардың алғашқы партиясы Қытаймен шекараға жеткізілді. Тамыз айының басында оларды трасса бойына орналастыру жұмыстары басталса, айдың ортасында дәнекерлеу және төсеу жұмыстары қолға алынады. Қыркүйекте өндіруші зауыттан газ айдау агрегаттарының алғашқы партиясын жөнелту жоспарланып отыр.
«Жылына 2,5 млрд текше метр газ өңдейтін Қашаған газ өңдеу зауытының құрылысы жобасы бойынша EPC-мердігер анықталды. FEED+EPC келісімшартына биылғы жылдың төртінші тоқсанында қол қою жоспарланып отыр», – деді Әлібек Жамауов.
Еске салайық, 2025 жылдың желтоқсанында Қарашығанақ газ өңдеу зауытын салу жобасына қытайлық CITIC Construction компаниясы қатысатыны хабарланған болатын. Бұған дейін Қазақстан Eni және Shell компанияларымен газ өңдеу зауытын салу мәселесі бойынша келіссөздер жүргізген. Алайда халықаралық консорциум жоба құнын едәуір арттыруды сұрағандықтан, қазақстандық тарап бұл шарттармен келіспеді.
Энергетика министрі Ерлан Ақкенженовтің айтуынша, қазіргі уақытта «ҚазМұнайГаз» салатын болашақ газ өңдеу зауытын Қарашығанақ жобасының қолданыстағы инфрақұрылымына қосу параметрлері бойынша келіссөздер жалғасып жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
